ബോളിവുഡിനെ നടുക്കി കെജിഎഫ് 2 വിന്റെ വിളയാട്ടം. പ്രദര്‍ശനത്തിനെത്തി 16 ദിവസങ്ങള്‍ക്കുള്ളില്‍ ചിത്രം ആഗോള തലത്തില്‍ 1000 കോടി കലക്ഷന്‍ പിന്നിട്ടു. ഇന്ത്യന്‍ സിനിമ ഇന്‍ഡസ്ട്രിയില്‍ ആയിരം കോടി ക്ലബില്‍ ഇടംപിടിക്കുന്ന നാലാമത്തെ ചിത്രം കൂടിയാണിത്.
രണ്ടായിരം കോടി ക്ലബില്‍ ഇടം നേടിയ ആമിര്‍ ഖാന്‍ ചിത്രം ദംഗല്‍, 1700 കോടി നേടിയ രാജമൗലി ചിത്രം ബാഹുബലി 2, 1100 കോടിക്കു മുകളില്‍ നേടി പ്രദര്‍ശനം തുടരുന്ന രാജമൗലി ചിത്രം ആര്‍ആര്‍ആര്‍ എന്നിവയാണ് ഇതിനു മുമ്പ് ഈ നേട്ടം കൈവരിച്ച ചിത്രങ്ങള്‍. നിലവിലെ വിജയകുതിപ്പ് തുടരുകയാണെകില്‍ കെജിഎഫ് 2 ഈ ചിത്രങ്ങളെയെല്ലാം മറികടക്കുമെന്നാണ് വിലയിരുത്തല്‍
ഏപ്രില്‍ 14ന് ആഗോള റിലീസായെത്തിയ ചിത്രം ആദ്യ ദിനം ഇന്ത്യയില്‍ നിന്നുമാത്രം 134.50 കോടിയാണ് സ്വന്തമാക്കിയത്. 100 കോടിയായിരുന്നു ചിത്രത്തിന്റെ ബജറ്റ്.ഇന്ത്യയില്‍ നിന്ന് മാത്രം 780 കോടിക്കു മുകളില്‍ നേടിയ ഈ ചിത്രം വിദേശ മാര്‍ക്കറ്റില്‍ നിന്നും സ്വന്തമാക്കിയത് 220 കോടിയോളമാണ്. ഹിന്ദി വേര്‍ഷന്‍ മാത്രം നേടിയത് നാനൂറു കോടിക്ക് മുകളില്‍ ആണ്.
Read more
തമിഴ് നാട്ടിലും, ആന്ധ്രയിലും റെക്കോര്‍ഡ് കളക്ഷന്‍ നേടുന്ന ഈ ചിത്രം കന്നഡയില്‍ പുതിയ ഇന്‍ഡസ്ട്രി ഹിറ്റായി മാറിക്കഴിഞ്ഞു. 7.48 കോടിയാണ് കെജിഎഫിന് കേരളത്തില്‍നിന്നുണ്ടായ ആദ്യ ദിന കലക്ഷന്‍. പൃഥ്വിരാജ് പ്രൊഡക്ഷന്‍സാണ് ചിത്രം സംസ്ഥാനത്ത് വിതരണം ചെയ്തത്.
