കന്നഡ സിനിമയ്ക്ക് എന്തുകൊണ്ടാണ് ഇംഗ്ലീഷ് പേര് നല്‍കിയത് എന്ന ചോദ്യത്തോട് പ്രതികരിച്ച് നടന്‍ കിച്ച സുദീപ്. റിലീസിനൊരുങ്ങിയ തന്റെ പുതിയ ചിത്രമായ ‘മാക്‌സ്’ എന്ന സിനിമാ ടൈറ്റിലിനെ കുറിച്ചുള്ള ചോദ്യത്തോടാണ് കിച്ച സുദീപ് പ്രതികരിച്ചിരിക്കുന്നത്. മാധ്യമപ്രവര്ത്തകന് കിച്ച സുദീപ് നല്‍കിയ മറുപടി വൈറലായിരിക്കുകയാണ്.
കന്നഡ സിനിമയ്ക്ക് എന്തിനാണ് ഇംഗ്ലീഷ് പേര് എന്നാണ് പ്രസ് മീറ്റിനിടെ മാധ്യമപ്രവര്‍ത്തകരില്‍ ഒരാള്‍ ചോദിച്ചത്. ചോദ്യം കേട്ട താരം ഏറെ നേരം മാധ്യമപ്രവര്‍ത്തകനെ നോക്കി നിന്നു. ശേഷം തന്റെ മുമ്പില്‍ വച്ചിരിക്കുന്ന ചാനല്‍ മൈക്കുകളെ ചൂണ്ടി അദ്ദേഹം ചോദിച്ചു, ഇതില്‍ എത്ര ഇംഗ്ലീഷ് പേരുകളുണ്ട് എന്ന് തിരിച്ച് ചോദിക്കുകയായിരുന്നു.
”ഇവിടെ ഒരുപാട് ചാനലുകളുണ്ട്. എല്ലാത്തിലും ഇംഗ്ലീഷുണ്ട്. കന്നഡയിലാണ് എഴുതിയിരിക്കുന്നത്. കാണുന്നത് കന്നഡക്കാരാണ്. ഞാന്‍ സംസാരിക്കുന്നത് കന്നഡയിലാണ്. ഇവിടെ ഇംഗ്ലീഷ് മീഡിയം സ്‌കൂളുകളുണ്ട്. അവിടെ പോകുന്നത് കന്നഡക്കാരാണ്. എന്താണ് നിങ്ങളുടെ പ്രശ്‌നം. ആപ്പിളിന് എന്താണ് കന്നഡയില്‍ പറയുന്നത്” എന്നും കിച്ച സുദീപ് മാധ്യമപ്രവര്‍ത്തകോരട് ചോദിച്ചു.
അതേസമയം, വിജയ് കാര്‍ത്തികേയ സംവിധാനം ചെയ്യുന്ന മാക്‌സ് ഡിസംബര്‍ 25ന് ആണ് തിയേറ്ററില്‍ എത്താനൊരുങ്ങുന്നത്. വരലക്ഷ്മി ശരത്കുമാര്‍, സംയുക്ത ഹൊര്‍ണാഡ്, സുകൃത, സുനില്‍ തുടങ്ങി നിരവധി താരങ്ങള്‍ ചിത്രത്തില്‍ വേഷമിടുന്നുണ്ട്. വി ക്രിയേഷന്‍സിന്റെ ബാനറില്‍ കലൈപുലി എസ് തനു ആണ് ചിത്രം നിര്‍മ്മിച്ചിരിക്കുന്നത്.