നടി ദുർഗ കൃഷ്ണയ്ക്കെതിരെയുള്ള സൈബർ ആക്രമണങ്ങളിൽ പ്രതികരിച്ച് നടൻ കൃഷ്ണ ശങ്കർ. ഇരുവരും ഒന്നിച്ചഭിനയിക്കുന്ന കുടുക്ക് എന്ന ചിത്രത്തിലെ ഗാനം പുറത്തിറങ്ങിയതിന് പിന്നാലെ ദുർഗയ്ക്ക് എതിരെ സൈബർ ആക്രമണങ്ങൾ നടന്നിരുന്നു. രണ്ട് ദിവസം മുമ്പ് ചിത്രത്തിന്റെ ട്രെയിലറും പുറത്തുവന്നു. ഇതിന് പിന്നാലെ വീണ്ടും നടിക്കെതിരെ അധിക്ഷേപങ്ങള്‍ നടക്കുന്നുവെന്ന് പറഞ്ഞാണ് കൃഷ്ണ ശങ്കർ രംഗത്തെത്തിയത്.
സിനിമയിലെ ലിപ്‍ലോക്ക് രംഗങ്ങളുമായി ബന്ധപ്പെട്ടും നിരവധി വിമർശനങ്ങളാണ് ദുർഗയ്ക്കെതിരെ സോഷ്യൽ മീഡിയായിൽ പ്രേത്യക്ഷപ്പെട്ട് കൊണ്ടിരിക്കുന്നത്. കൂട്ടുപ്രതിയായ താന്‍ സുഖമായി ഉറങ്ങാന്‍ പോകുമ്പോള്‍ ഇപ്പോഴും ആളുകള്‍ ദുര്‍ഗയെയും അവരുടെ ഭർത്താവ് ആയ അര്‍ജുനെയും വീട്ടുകാരെയും പറ്റി മോശമായി സംസാരിക്കുന്നുവെന്നും കൃഷ്ണ ശങ്കര്‍ പറഞ്ഞു.
സോഷ്യൽ മീഡിയായിലൂടെ വരുന്ന വിമർശനങ്ങളുടെ പേരിൽ ദുർഗ, സിനിമ ഉപേക്ഷിക്കേണ്ടി വന്നാൽ അത് അവരുടെ സ്വപ്നം ഉപേക്ഷിക്കുന്നതിനു തുല്യമാണ്. അതിനു മാറ്റം കൊണ്ടുവരേണ്ടത് നമ്മൾ ഓരോരുത്തരുമാണെന്നും കൃഷ്ണ ശങ്കർ പറയുന്നു.
കൃഷ്ണ ശങ്കറിന്റെ വാക്കുകൾ ഇങ്ങനെ..:
ഇന്ന് കുറച്ചു നേരം മുമ്പ് ദുർഗ കൃഷ്ണയുടെ ഒരു കോൾ വന്നു. ഞങ്ങൾ ഒരുമിച്ചഭിനയിച്ച ഒരു സിനിമയിലെ ഗാന രംഗത്തിലെ സീൻ കാരണം ഇപ്പോഴും ഇന്ന് ഈ രാത്രിയിലും ദുർഗയെയും അവരുടെ ഭർത്താവ് ആയ അർജുനെയും വീട്ടുകാരെയും മോശമായി സംസാരിക്കുന്നു. ഇതിൽ കൂട്ടുപ്രതിയായ ഞാൻ എന്റെ വീട്ടിൽ കുട്ടികളെയും കളിപ്പിച്ച് ഭാര്യയായി സുഖമായി ഉറങ്ങാൻ പോകുന്നു. രണ്ടു പേരും ചെയ്തത് അവരവരുടെ ജോലിയാണ്.
പക്ഷേ വിമർശനം മുഴുവൻ സ്ത്രീയായ ദുർഗ കൃഷ്ണയ്ക്ക് മാത്രമാണ്. ഇതിനു മുമ്പ് ഞാൻ ഒരു ഇന്റർവ്യൂവിൽ പറഞ്ഞത് പോലെ ഒരു നല്ല കഥയുണ്ട്, പക്ഷേ അതിൽ അഞ്ച് ലിപ്‌ലോക്കുമുണ്ട്. എന്ന് പറഞ്ഞാൽ ലിപ്‌ലോക്കിന്റെ ആശങ്കകൾ മാറ്റിവച്ച് ഒരു സെക്കൻഡ് പോലും ആലോചിക്കാതെ ആ സിനിമ ഞാൻ ചെയ്യാം. കാരണം ഒരു നല്ല സിനിമ ചെയ്യുക എന്നതാണ് ഒരു നടന്റെ ഏറ്റവും വലിയ ലക്ഷ്യം.
പക്ഷേ അത് തന്നെ ഇവർക്ക് വരുമ്പോൾ കഴിഞ്ഞ പടത്തിൽ ഇതിന്റെ പേരിൽ അനുഭവിക്കേണ്ടി വന്ന മോശം എക്സ്പീരിയൻസ് കൊണ്ട് ആ സിനിമ തന്നെ ഇവർ ഉപേക്ഷിക്കേണ്ടി വന്നാൽ അത് അവരുടെ ഏറ്റവും വലിയ സ്വപ്നം ഉപേക്ഷിക്കുന്നതിനു തുല്യമാകും. ഇതിനൊരു മാറ്റം നമ്മൾ തന്നെ കൊണ്ട് വരണം, നട്ടെല്ലില്ലാത്തവൻ എന്നവരുടെ ഭർത്താവിനെ പറയുമ്പോൾ എത്ര ആളുകൾ ഉണ്ട് അയാളെ പോലെ ഭാര്യയോടുള്ള സ്നേഹവും വിശ്വാസവും അവർ ചെയ്യുന്ന ജോലിയോടുള്ള ബഹുമാനവും ഉള്ളവർ.
അത് കൊണ്ട് ഇത്തരത്തിലുള്ള കമന്റുകൾ എഴുതുമ്പോൾ ഒരു നിമിഷം മുമ്പ് നിങ്ങൾ നിങ്ങളുടെ വീട്ടുകാരെ ഒന്ന് സ്മരിക്കുക എന്ന് പറഞ്ഞു കൊണ്ടാണ് കൃഷ്ണ വാക്കുകൾ അവസാനിപ്പിച്ചത് .