ക്രിഷ് വീണ്ടും എത്തുമെന്ന് അറിയിച്ച് നടന്‍ ഹൃത്വിക് റോഷന്‍. ‘ക്രിഷ് 4’ന്റെ പണിപ്പുരയിലാണ് താനെന്നും ചിത്രത്തിന്റെ ഷൂട്ടിംഗ് ഉടനെ ഉണ്ടാകുമെന്നും ഹൃത്വിക് റോഷന്‍ പറഞ്ഞു. പിങ്ക് വില്ലയ്ക്ക് നല്‍കിയ അഭിമുഖത്തിലായിരുന്നു നടന്റെ വെളിപ്പെടുത്തല്‍.
ക്രിഷ് 4-മായി ബന്ധപ്പെട്ട ജോലികള്‍ നടന്നുകൊണ്ടിരിക്കുകയാണ്. ചെറിയൊരു സാങ്കേതിക പ്രശ്‌നമുണ്ട്. 2023 അവസാനത്തോടെ ആ പ്രശ്നത്തിന് പരിഹാരം ഉണ്ടാകുമെന്നാണ് പ്രതീക്ഷ. ഉടന്‍ തന്നെ അത് സംഭവിക്കും. മറ്റ് കാര്യങ്ങളെല്ലാം ഞാന്‍ എന്റെ നിര്‍മ്മാതാക്കള്‍ക്ക് വിട്ട് കൊടുക്കുകയാണ്. ബാക്കി എല്ലാം അവര്‍ പറയും.
ചിത്രത്തിന്റെ ഔദ്യോഗിക പ്രഖ്യാപനവും ഉടന്‍ ഉണ്ടാകും’, ഹൃത്വിക് റോഷന്‍ പറഞ്ഞു. 2003ല്‍ പുറത്തിറങ്ങിയ ‘കോയി മില്‍ ഗയ’ ആണ് ക്രിഷ് സീരീസിലെ ആദ്യ ചിത്രം. 2006ല്‍ ‘ക്രിഷും’ 2013ല്‍ ‘ക്രിഷ് 3’യും റിലീസ് ചെയ്തിരുന്നു.
ആദ്യ രണ്ട് ചിത്രങ്ങളും ബോക്‌സ് ഓഫീസിലും മികച്ച പ്രകടനം കാഴ്ചവച്ചിരുന്നു. വന്‍ ഹൈപ്പോടെ എത്തിയ ‘ക്രിഷ് 3’യ്ക്ക് പക്ഷേ ബോക്‌സ് ഓഫീസില്‍ വേണ്ടത്ര ശോഭിക്കാന്‍ സാധിച്ചില്ലെന്നാണ് റിപ്പോര്‍ട്ടുകള്‍ പറയുന്നത്. രാകേഷ് റോഷനാണ് മൂന്ന് ചിത്രങ്ങളും സംവിധാനം ചെയ്തത്.
