അല്‍ഫോണ്‍സ് പുത്രന്റെ നേരത്തിന് ശേഷം ഒരു എപ്പിസോഡിക്കല്‍ ചിത്രം കൂമ്പാരീസ് തിയേറ്ററുകളിലെത്താന്‍ തയ്യാറെടുക്കുകയാണ്. ചിത്രത്തിന്റെ പേര് വന്ന വഴി പറഞ്ഞിരിക്കുകയാണ് സംവിധായകന്‍ സാഗര്‍ ഹരി.
നാലു സുഹൃത്തുക്കളുടെ കഥ പറയുന്ന കുമ്പാരീസ് കോമഡി ത്രില്ലര്‍ വിഭാഗത്തില്‍ പെടുന്നൊരു ചിത്രമാണ്. ഉറ്റസ്‌നേഹിതന്മാരായിട്ടുള്ളവര്‍ പരസ്പരം കുമ്പാരി എന്നു വിളിക്കുന്ന ഒരു പതിവ് ആലപ്പുഴ, എറണാകുളം, കൊല്ലം പ്രദേശത്തുള്ളവരുടെ ഇടയില്‍ ഉണ്ട്. ഈയൊരു വിളിപ്പേരാണ് ചിത്രത്തിന്റെ ടൈറ്റിലായ കുമ്പാരീസ് ആയി മാറിയിരിക്കുന്നത്. സമയവുമായുള്ള അഭിമുഖത്തില്‍ അദ്ദേഹം പറഞ്ഞു.
ആലപ്പുഴ നഗരം ആണ് സിനിമയുടെ കഥാപശ്ചാത്തലം. കണ്ടു വളര്‍ന്ന ആളുകളേയും ആ ഒരു സംസ്‌കാരത്തേയുമൊക്കെ കണ്ടു കൊണ്ടാണ് ചിത്രത്തിന്റെ കഥയൊരുക്കിയിരിക്കുന്നത്. ഒരു റിയലിസ്റ്റിക്കല്‍ ഡ്രാമയാണ് ചിത്രം എന്നും സംവിധായകന്‍ കൂട്ടി ചേര്‍ത്തു. സിനിമയുടെ തിരക്കഥ ഒരുക്കുന്നത് സംവിധായകന്‍ തന്നെ ആണ്.
ക്വീന്‍ ഫെയിം അശ്വിന്‍ ജോസ്, എല്‍ദോ മാത്യു, ജെന്‍സണ്‍ (മാട) ഷാലു റഹിം എന്നിവരാണ് കേന്ദ്ര കഥാപാത്രങ്ങളാകുന്നത്. പുതുമുഖ താരങ്ങളായ റോണ, അസ്ത്രാ ലക്ഷ്മി, ഷാനു ബൂട്ടോ, അന്‍സാര്‍, സുജിത്ത്, ശ്രീകാന്ത്, ജിജോ ജോര്‍ജ് എന്നിവരെ കൂടാതെ മലയാളത്തിലെ മുന്‍നിര താരങ്ങളും പ്രധാന വേഷത്തില്‍ എത്തുന്നു. അബ്രഹാമിന്റെ സന്തതികള്‍, ക്യാപ്റ്റന്‍ എന്നീ ചിത്രങ്ങള്‍ക്ക് ശേഷം ഗുഡ് വില്‍ എന്റ്റര്‍റ്റെയിന്‍മെന്റ്‌സിന്റെ ബാനറില്‍ ജോബി ജോര്‍ജ് നിര്‍മ്മിക്കുന്ന ചിത്രമാണ് കുമ്പാരീസ്. ശ്രീകാന്ത് ഈശ്വര്‍ ആണ് ഛായാഗ്രഹണം. ചിത്രത്തിലെ “കലിപ്പ്” പ്രോമോ സോംഗ് ശ്രദ്ധ നേടിയിരുന്നു.