സോഷ്യല്‍ മീഡിയയില്‍ തരംഗമായി ‘നിറം’ സിനിമ. ശാലിനിയും കുഞ്ചാക്കോ ബോബനും തകര്‍ത്ത് അഭിനയിച്ച നിറം സിനിമയാണ് ഇപ്പോള്‍ മീമുകളിലും ട്രോളുകളിലും നിറഞ്ഞു കൊണ്ടിരിക്കുന്നത്. 1999ല്‍ കമലിന്റെ സംവിധാനത്തില്‍ എത്തിയ ചിത്രത്തിലെ സംഭാഷണങ്ങളാണ് ഇപ്പോള്‍ സോഷ്യല്‍ മീഡിയയില്‍ നിറയുന്നത്.
ചിത്രത്തിലെ എല്ലാ ഡയലോഗുകള്‍ക്കൊപ്പവും ഒരു ‘ടാ’ കൂടുതലുണ്ട്. ഇതാണ് ട്രോളുകളില്‍ നിറയുന്നത്. ശാലിനിയുടെയും കുഞ്ചാക്കോയുടെയും കഥാപാത്രങ്ങളായ എബിയും സോനയും സംസാരിക്കുന്ന കാര്യങ്ങളാണ് മീമുകളില്‍ നിറയുന്നത്.
‘ഇതെന്താ എല്ലാത്തിന്റെ അവസാനം ”ഡാ” എന്ന് എഴുതിയിരിക്കുന്നെ, നിറം സിനിമയുടെ സ്‌ക്രിപ്റ്റാ..’, ‘അന്ന് ഈ സിനിമ കാണുമ്പോഴും ഇന്ന് ഈ സിനിമ കാണുമ്പോഴും’… എന്നിങ്ങനെയുള്ള ട്രോളുകളാണ് വൈറലാകുന്നത്. ചിത്രത്തിലെ ‘ശുക്രിയാ’ എന്ന ഗാനവും, ‘യൂ ചീറ്റ്’ എന്ന് ശാലിനി പറയുന്ന രംഗങ്ങളും അടക്കം ട്രോളുകളില്‍ നിറയുന്നുണ്ട്.
ട്രോളുകള്‍ വ്യാപകമായതോടെ ‘നിറം ഒ.ടി.ടി റിലീസ് ആയോന്ന് നോക്കിയതാടാ’ എന്ന എബി പറയുന്ന മീമും എത്തിയിട്ടുണ്ട്. അതേസമയം, ഒരു കാലത്ത് ഏറെ ആഘോഷിക്കപ്പെട്ട കോമ്പോയാണ് ശാലിനി-കുഞ്ചാക്കോ ബോബന് ജോഡി. ‘അനിയത്തി പ്രാവ്’ സൂപ്പര്‍ ഹിറ്റ് ആയപ്പോള്‍ ഈ കോമ്പോയില്‍ നിരവധി ചിത്രങ്ങളും എത്തി.
അനിയത്തിപ്രാവിന് ശേഷം ഏറെ ആഘോഷിക്കപ്പെട്ട കുഞ്ചാക്കോ-ശാലിനി ചിത്രമാണ് ‘നിറം’. അടുത്ത സുഹൃത്തുക്കള്‍ ഒടുവില്‍ പരസ്പരം പ്രണയത്തിലാകുന്ന കഥ പറഞ്ഞ് എത്തിയ നിറത്തിന് തിരക്കഥ ഒരുക്കിയത് ഇക്ബാല്‍ കുറ്റിപ്പുറം ആണ്.
നിറം പിന്നീട് തമിഴിലേക്ക് റീമേക്ക് ചെയ്തിട്ടുണ്ട്. ശാലിനി തന്നെയായിരുന്നു റീമേക്കിലെ നായിക. ‘പിരിയാദ വരം വേണ്ടും’ എന്ന പേരിലാണ് ചിത്രം തമിഴില്‍ റീമേക്ക് ചെയ്തത്. കുഞ്ചാക്കോ ബോബന് പകരം പ്രശാന്താണ് ചിത്രത്തില്‍ നായക വേഷം ചെയ്തത്. കമല്‍ തന്നെയായിരുന്നു സംവിധായകന്‍. പക്ഷെ ഈ സിനിമ വിജയിച്ചില്ല.