സൗബിന്‍ ഷാഹിര്‍, മംമ്ത മോഹന്‍ദാസ് എന്നിവരെ കേന്ദ്ര കഥാപാത്രങ്ങളാക്കി ലാല്‍ജോസ് ഒരുക്കുന്ന ‘മ്യാവു’ ചിത്രത്തിലെ വീഡിയോ ഗാനം പുറത്ത്. ‘ഹിജാബി’ എന്ന ഗാനമാണ് എത്തിയിരിക്കുന്നത്. സുഹൈയില്‍ കോയ രചിച്ച വരികള്‍ക്ക് ജസ്റ്റിന്‍ വര്‍ഗീസ് സംഗീതം ഒരുക്കി, അദീഫ് മുഹമ്മദ് ആണ് ഗാനം ആലപിച്ചിരിക്കുന്നത്.
വിക്രമാദിത്യക്ക് ശേഷം ലാല്‍ജോസും ഡോ. ഇക്ബാല്‍ കുറ്റിപ്പുറവും ഒരുമിക്കുന്ന ചിത്രമാണ് മ്യാവു. രണ്ട് വര്‍ഷത്തിന് ശേഷം എത്തുന്ന ഒരു ലാല്‍ജോസ് ചിത്രം എന്ന പ്രത്യേകതയും മ്യാവുവിനുണ്ട്. ടൈറ്റില്‍ പൂച്ചയുടെ ശബ്ദമായ മ്യാവു കൊണ്ട് തന്നെ ലാല്‍ജോസിന്റെ ചിത്രം ശ്രദ്ധ പിടിച്ചിരുന്നു.
ചിത്രത്തില്‍ സൗബിന്റെ ഭാര്യയായിട്ടാണ് മംമ്ത എത്തുന്നത്. യുഎഇലെ റാസല്‍ഖൈമിയില്‍ താമസിക്കുന്ന ദസ്തക്കീറിന്റെയും കുടുംബത്തിന്റെയും കഥയാണ് മ്യാവു. ചിത്രത്തില്‍ ഒരു പൂച്ചയും പ്രധാന കഥാപാത്രമായി എത്തുന്നുണ്ട്. ഇരുവരെയും കൂടാതെ സലീം കുമാര്‍, ഹരിശ്രീ യുസഫ്, കുറെ പുതുമുഖ താരങ്ങളും ചിത്രത്തില്‍ അണിനിരക്കുന്നുണ്ട്.
തോമസ് തിരുവല്ല ഫിലിംസിന്റെ ബാനറില്‍ തോമസ് തിരുവല്ലയാണ് നിര്‍മാണം. ഛായാഗ്രഹണം അജ്മല്‍ ബാബു. സുഹൈല്‍ കോയയുടെ വരികള്‍ക്ക് ജസ്റ്റിന്‍ വര്‍ഗീസ് സംഗീതം പകരുന്നു. ചിത്രം ഡിസംബര്‍ 24ന് ആണ് തിയേറ്ററില്‍ റിലീസ് ചെയ്യുന്നത്.