മുപ്പത്തിയഞ്ച് വര്‍ഷങ്ങള്‍ക്ക് ശേഷം ഒരേ ഫ്രെയിമില്‍ സംവിധായകന്‍ ജോഷിക്കും നടി നദിയ മൊയ്തുവിനുമൊപ്പം വന്നതിന്റെ സന്തോഷം പങ്കുവെച്ച് നടി ലിസി. മണിയന്‍പിള്ള രാജുവിന്റെ മകന്‍ സച്ചിന്റെ വിവാഹ വിരുന്നിലാണ് ഇവര്‍ വീണ്ടും കണ്ടത്. ചടങ്ങിനിടെ പകര്‍ത്തിയ ചിത്രവും 35 വര്‍ഷം മുമ്പ് “ഒന്നിങ്ങു വന്നെങ്കില്‍” എന്ന ചിത്രത്തിന്റെ ലൊക്കേഷനില്‍ നിന്നു പകര്‍ത്തിയ, തങ്ങള്‍ ഒന്നിച്ചുള്ള പഴയ ചിത്രവും ലിസി പങ്കു വെച്ചു.
“അന്നും ഇന്നും, ജോഷി സാറിനെ വര്‍ഷങ്ങള്‍ക്ക് ശേഷമാണ് കണ്ടത്. മണിയന്‍പിള്ള രാജു ചേട്ടന്റെ മകന്റെ വിവാഹ സത്ക്കാരത്തില്‍ വെച്ചാണ് അദ്ദേഹത്തെ കണ്ടത്. നാദിയയേയും ജോഷി സാറിനേയും ഒരുമിച്ച് കണ്ടത് 35 വര്‍ഷത്തിന് മുമ്പ് ഒന്നിങ്ങു വന്നെങ്കില്‍ എന്ന സിനിമയ്ക്ക് വേണ്ടിയായിരുന്നു.” ചിത്രം പങ്കുവെച്ച് ലിസി കുറിച്ചു.
തിരുവനന്തപുരം ശംഖുമുഖം ദേവി ക്ഷേത്രത്തില്‍ വച്ചായിരുന്നു മണിയന്‍ പിള്ള രാജുവിന്റെ മകന്‍ സച്ചിനും ഐശ്വര്യ പി. നായരും തമ്മിലുള്ള വിവാഹം. അടുത്ത ബന്ധുക്കള്‍ മാത്രമാണ് വിവാഹത്തില്‍ പങ്കെടുത്തതെങ്കിലും ദമ്പതികള്‍ക്ക് ആശംസകള്‍ അറിയിക്കാന്‍ ചലച്ചിത്ര പ്രവര്‍ത്തകര്‍ ഒന്നടങ്കം എത്തിയിരുന്നു.