ഈ ആഴ്ച ഒ.ടി.ടി പ്ലാറ്റ്‌ഫോമുകളില്‍ സ്ട്രീമിംഗ് ആരംഭിക്കാനൊരുങ്ങി നാല് ചിത്രങ്ങള്‍. നാല് ഭാഷകളിലുള്ള നാല് ചിത്രങ്ങളാണ് ഏപ്രില്‍ 27, 28 തിയതികളിലായി വിവിധ ഒ.ടി.ടി പ്ലാറ്റ്‌ഫോമുകളില്‍ റിലീസിന് ഒരുങ്ങുന്നത്. തെലുങ്ക് ചിത്രം ‘ദസറ’ മുതല്‍ മലയാള ചിത്രം ‘തുറമുഖം’ വരെ ഈ ആഴ്ച ഒ.ടി.ടിയില്‍ എത്തും.
നാനിയുടെ ആദ്യ 100 കോടി ചിത്രമായ ‘ദസറ’ ഏപ്രില്‍ 27ന് നെറ്റ്ഫ്‌ളിക്‌സില്‍ സ്ട്രീം ചെയ്യും. തിയേറ്റര്‍ പ്രിന്റില്‍ നിന്നും ഒഴിവാക്കിയ 12 മിനിറ്റോളം വരുന്ന ദൃശ്യങ്ങള്‍ ഉള്‍പ്പെടുത്തിയാണ് ചിത്രം നെറ്റ്ഫ്‌ളിക്‌സില്‍ എത്തുക. മാര്‍ച്ച് 30ന് ആയിരുന്നു ചിത്രം തിയേറ്ററില്‍ എത്തിയത്. ശ്രീകാന്ത് ഒഡേല സംവിധാനം ചെയ്ത ചിത്രംകല്‍ക്കരി ഖനികളുടെ പശ്ചാത്തലത്തിലാണ് കഥ പറഞ്ഞത്.
ചിമ്പു ചിത്രം ‘പത്തുതല’ ആമസോണ്‍ പ്രൈമില്‍ ഏപ്രില്‍ 27ന് സ്ട്രീമിംഗ് ആരംഭിക്കും. ഒബെലി എന്‍. കൃഷ്ണ തിരക്കഥയും സംവിധാനവും നിര്‍വ്വഹിച്ച ചിത്രമാണ് പത്തുതല. മാര്‍ച്ച് 30ന് ആയിരുന്നു ചിത്രം തിയേറ്ററുകളില്‍ എത്തിയത്. കന്നഡ ചിത്രമായ മഫ്തിയുടെ റീമേക്കാണ് ഈ ചിത്രം. 50 കോടിയോളം ചിത്രം കളക്ഷന്‍ നേടിയിരുന്നു.
നിവിന്‍ പോളി ചിത്രം ‘തുറമുഖം’ ഈ മാസം 28ന് സോണി ലിവില്‍ സ്ട്രീം ചെയ്യും. മാര്‍ച്ച് 10ന് ആയിരുന്നു ചിത്രം തിയേറ്ററുകളില്‍ എത്തിയത്. ധാരാളം പ്രതിസന്ധികള്‍ക്ക് ശേഷമായിരുന്നു ചിത്രം തിയേറ്ററുകളില്‍ എത്തിയത്. രാജീവ് രവി സംവിധാനം ചെയ്ത ചിത്രം തിയേറ്ററുകളില്‍ എത്തിച്ചത് ലിസ്റ്റിന്‍ സ്റ്റീഫനാണ്.
പ്രിയങ്ക ചോപ്രയുടെ സിറ്റാഡില്‍ 28ന് ആമസോണ്‍ പ്രൈമില്‍ റിലീസ് ചെയ്യും. പ്രിയങ്ക ചോപ്ര ജോനാസും റിച്ചാര്‍ഡ് മാഡനും കേന്ദ്ര കഥാപാത്രത്തെ അവതരിപ്പിക്കുന്ന ഈ സീരീസില്‍ സ്റ്റാന്‍ലി ടുച്ചിയും ലെസ്ലി മാന്‍വില്ലെയും അഭിനയിക്കുന്നു. ലോകമെമ്പാടുമുള്ള 240ലധികം രാജ്യങ്ങളില്‍ സിറ്റാഡല്‍ ലഭ്യമാകും.