രജനികാന്തിനെ നായകനാക്കി ‘കൂലി’ എന്ന സിനിമ ഒരുക്കും മുമ്പ് ശബരിമല സന്ദര്‍ശിച്ച് ലോകേഷ് കനകരാജ്. ലോകേഷിനൊപ്പം ‘ലിയോ’യുടെ സഹഎഴുത്തുകാരനും നിര്‍മ്മാതാവുമായ രത്നകുമാറും ഉണ്ടായിരുന്നു. ലോകേഷിനൊപ്പം ശബരിമലയില്‍ ദര്‍ശനം നടത്തിയതിന്റെ ചിത്രം രത്‌നകുമാറാണ് എക്‌സില്‍ പങ്കുവച്ചിരിക്കുന്നത്.
‘വിത്ത് ഗ്യാങ്‌സ്റ്റര്‍ സ്‌ക്വാഡ്’ എന്ന ക്യാപ്ഷനോടെയാണ് രത്‌നകുമാര്‍ ലോകേഷിനും സുഹൃത്തുക്കള്‍ക്കും ഒപ്പമുള്ള ചിത്രങ്ങള്‍ പങ്കുവച്ചിരിക്കുന്നത്. അതേസമയം, ജൂണില്‍ ചെന്നൈയില്‍ വച്ച് കൂലിയുടെ ഷൂട്ടിംഗ് തുടങ്ങുമെന്നാണ് വിവരം. രജനികാന്തിന്റെ 171-ാമത്തെ ചിത്രം കൂടിയാണ് കൂലി.
സണ്‍പിക്‌ചേഴ്‌സ് നിര്‍മ്മിക്കുന്ന ചിത്രത്തില്‍ ഒരു കള്ളക്കടത്തുകാരനായാണ് രജിനി എത്തുന്നത് എന്നാണ് റിപ്പോര്‍ട്ടുകള്‍. അനിരുദ്ധ് രവിചന്ദര്‍ ആണ് ചിത്രത്തിന് സംഗീതം ഒരുക്കുന്നത്. അടുത്ത വര്‍ഷം റിലീസ് ചെയ്യാനുള്ള പ്ലാനിലാണ് സിനിമ ഒരുക്കുന്നത് എന്നാണ് വിവരം.
കൂലിക്ക് ശേഷം ‘കൈദി’ എന്ന ഹിറ്റ് ചിത്രത്തിന്റെ രണ്ടാം ഭാഗമാണ് ലോകേഷ് ഒരുക്കുക. കാര്‍ത്തി നായകനാക്കി ഒരുക്കിയ ചിത്രമാണ് കൈദി. ഈ ചിത്രത്തോടെയാണ് ലോകേഷ് കനകരാജിന്റെ സിനിമാറ്റിക് യൂണിവേഴ്‌സ് ആരംഭിച്ചത്. കൈദിക്ക് ശേഷം കമല്‍ ഹാസന്‍ ചിത്രം ‘വിക്രം 2’ ആകും ലോകേഷ് ഒരുക്കുക.