‘എമ്പുരാന്‍’ സിനിമയുടെ പുതിയ വിവരങ്ങള്‍ ഒന്നും പുറത്തു വന്നിട്ടില്ലെങ്കിലും പ്രേക്ഷകര്‍ ഏറെ പ്രതീക്ഷയോടെയാണ് ചിത്രത്തിനായി കാത്തിരിക്കുന്നത്. ‘ലൂസിഫര്‍’ സിനിമയുടെ ലൊക്കേഷനായ ചീന്തലാര്‍ പള്ളി എമ്പുരാന്റെയും ലൊക്കേഷനാകുമോ എന്ന ആകാംഷയിലാണ് നാട്ടുകാര്‍.
ലൂസിഫറിലൂടെ വിനോദസഞ്ചാരികളുടെ ഇഷ്ടം നേടിയ ഇടമാണ് ചീന്തലാര്‍ പള്ളി. മോഹന്‍ലാലും മഞ്ജു വാര്യരും ചേര്‍ന്നുള്ള പ്രധാന രംഗം ചിത്രീകരിച്ചതോടെയാണ് ചീലന്താര്‍ പള്ളിക്ക് ലൂസിഫര്‍ പള്ളി എന്ന വിളിപ്പേര് വന്നത്. സിനിമയുടെ അണിയറ പ്രവര്‍ത്തകരാണ് ഏഴ് ലക്ഷം രൂപ ചിലവഴിച്ച് പള്ളി പുതുക്കി പണിതത്.
അതേസമയം, കഴിഞ്ഞ വര്‍ഷം ആഗസ്റ്റില്‍ എമ്പുരാന്‍ തുടങ്ങുന്നതായി പൃഥ്വിരാജ് വ്യക്തമാക്കിയിരുന്നു. 2019ലെ ഏറ്റവും വലിയ ഹിറ്റായിരുന്നു ലൂസിഫര്‍. 200 കോടി ക്ലബില്‍ കയറിയ ചിത്രം നിലവില്‍ മലയാളത്തില്‍ ഏറ്റവും കൂടുതല്‍ കളക്ഷന്‍ നേടിയ ചിത്രമാണ്.
എമ്പുരാന്‍ ലൂസിഫറിന് മുകളില്‍ നില്‍ക്കുമെന്നും വലിയ മുടക്കു മുതല്‍ വേണ്ടി വരുന്ന ചിത്രമാണിതെന്നും പൃഥ്വിരാജും മോഹന്‍ലാലും പറഞ്ഞിരുന്നു. എമ്പുരാന്റെ തിരക്കഥ പൂര്‍ത്തിയാക്കിയ വിവരം അടുത്തിടെ പൃഥ്വിരാജ് തുറന്നു പറഞ്ഞിരുന്നു.
എമ്പുരാന്റെ ഫുള്‍ സ്‌ക്രിപ്റ്റ് ലോക്ക് ചെയ്തു. സ്‌ക്രിപ്റ്റ് ലോക്ക് ചെയ്ത വിവരം ലാലേട്ടനെയും ആന്റണി പെരുമ്പാവൂരിനെയും അറിയിച്ചിട്ടുണ്ടെന്നും പൃഥ്വിരാജ് പറഞ്ഞിരുന്നു. അടുത്ത വര്‍ഷം ഷൂട്ടിംഗ് തുടങ്ങാനാണ് പദ്ധതിയിടുന്നതെന്നും പൃഥ്വിരാജ് ഒരു സിനിമയുടെ പ്രമോഷനുമായി ബന്ധപ്പെട്ട സംസാരിക്കവെ പറഞ്ഞിരുന്നു.