മലയാളി പ്രേക്ഷകര്‍ ഏറ്റെടുത്ത ചിത്രമാണ് “മഹേഷിന്റെ പ്രതികാരം”. ചിത്രത്തില്‍ ഉള്‍പ്പെടുത്താന്‍ സാധിക്കാതെ പോയ ഒരു ഗാനമാണ് ഇപ്പോള്‍ അണിയറപ്രവര്‍ത്തകര്‍ പുറത്തു വിട്ടിരിക്കുന്നത്. “ഏതേതോ” എന്ന ഗാനമാണ് ഇപ്പോള്‍ പുറത്തു വിട്ടിരിക്കുന്നത്. ചിത്രത്തിന്റെ തെലുങ്ക് പതിപ്പായ “ഉമാ മഹേശ്വര ഉഗ്ര രൂപസ്യ”യില്‍ ഈ ഗാനം മറ്റൊരു രൂപത്തില്‍ അവതരിപ്പിച്ചിരുന്നു.
ഇതോടെയാണ് ഇരുസിനിമകളുടെയും സംഗീതസംവിധായകനായ ബിജിബാല്‍ ആദ്യ ഗാനം പുറത്തിറക്കാനായി തീരുമാനിച്ചത്. മഹേഷിന്റെ പ്രതികാരത്തിലെ “മൗനങ്ങള്‍” എന്ന ഗാനത്തിന് പകരം ആദ്യം ചെയ്ത് പാട്ടുകളിലൊന്നാണ് ഇത്. തെലുങ്കില്‍ “ആനന്ദം” എന്ന ഗാനമാണ് ഈ ഈണത്തില്‍ ഒരുക്കിയത്.
“”മഹേഷിന്റെ പ്രതികാരത്തിനായി ബിജിയേട്ടന്‍ ഒരുക്കിയ പാട്ട്. സിനിമയില്‍ ഉള്‍പ്പെടുത്താന്‍ സാധിച്ചില്ല. കുറച്ചു വൈകിയിട്ടാണെങ്കിലും ഒരുപട് സന്തോഷത്തോടെ റിലീസ് ചെയ്യുന്നു”” എന്നാണ് ഗാനം പുറത്തു വിട്ടുകൊണ്ട് ചിത്രത്തിന്റെ സംവിധായകന്‍ ദിലീഷ് പോത്തന്‍ ഫെയ്‌സ്ബുക്കില്‍ കുറിച്ചത്.
2016-ല്‍ റിലീസ് ചെയ്ത മഹേഷിന്റെ പ്രതികാരം ഫഹദ് ഫാസിലിന്റെ മികച്ച സിനിമകളിലൊന്നാണ്. അപര്‍ണ ബാലമുരളി, സൗബിന്‍ ഷാഹില്‍, അലന്‍സിയര്‍, സുജിത് ശങ്കര്‍, അനുശ്രീ എന്നിവരാണ് ചിത്രത്തിലെ പ്രധാന കഥാപാത്രങ്ങളായി എത്തിയത്. ശ്യാം പുഷ്‌ക്കരന്‍ തിരക്കഥ ഒരുക്കി ആഷിഖ് അബുവാണ് ചിത്രം നിര്‍മ്മിച്ചത്.