‘മലൈകോട്ടൈ വാലിബന്‍’ തിയേറ്ററുകളില്‍ ആരവം തീര്‍ക്കുകയാണ്. ചുരുക്കം ചില നെഗറ്റീവ് പ്രതികരണങ്ങള്‍ നേടുന്ന ചിത്രത്തിന് കൂടുതലും പൊസിറ്റീവ് പ്രതികരണങ്ങളാണ് ലഭിച്ചു കൊണ്ടിരിക്കുന്നത്. രണ്ടാം ഭാഗത്തിനുള്ള സൂചന നല്‍കികൊണ്ടാണ് ചിത്രം അവസാനിക്കുന്നത്.
നേരത്തെ തന്നെ മലൈകോട്ടൈ വാലിബന്‍ രണ്ട് ഭാഗങ്ങളായാണ് എത്തുക എന്ന റിപ്പോര്‍ട്ടുകള്‍ പുറത്തെത്തിയിരുന്നു. ‘റംബാന്‍’ എന്ന സിനിമയുടെ ചിത്രീകരണത്തിന് ശേഷം മോഹന്‍ലാല്‍ വീണ്ടും ലിജോയുമായി കൈ കോര്‍ക്കും എന്നായിരുന്നു വാര്‍ത്ത.
വാലിബന്റെ രണ്ടാം ഭാഗത്തിനായാകും ഇരുവരും വീണ്ടും കൈകോര്‍ക്കുക എന്നത് ഉറപ്പിക്കുന്നതാണ് പുറത്തു വരുന്ന പ്രതികരണങ്ങള്‍. ഫാന്റസി ത്രില്ലര്‍ ആണ് മലൈക്കോട്ട വാലിബന്‍. നായകന്‍, ആമേന്‍ തുടങ്ങിയ ചിത്രങ്ങളില്‍ ലിജോയ്ക്കൊപ്പം പ്രവര്‍ത്തിച്ചിട്ടുള്ള പി എസ് റഫീഖ് ആണ് മലൈക്കോട്ടൈ വാലിബന്റെ കഥ ഒരുക്കിയിരിക്കുന്നത്.
എല്‍ജെപിയുടെ മാജിക് ആണ്, മികച്ച സിനിമ എന്നിങ്ങനെയുള്ള നല്ല പ്രതികരണങ്ങളാണ് ചിത്രത്തിന് ലഭിച്ചു കൊണ്ടിരിക്കുന്നത്. എന്നാല്‍ സിനിമ വളരെ ലാഗ് ആണ്, തിയേറ്ററില്‍ ഉറങ്ങാം എന്നിങ്ങനെയുള്ള പ്രതികരണങ്ങളും ചിത്രത്തിന് ലഭിക്കുന്നുണ്ട്.
സിനിമയിലെ ദൃശ്യങ്ങള്‍ പ്രേക്ഷകരെ വിസ്മയിപ്പിക്കുന്നു എന്നാണ് മിക്ക അഭിപ്രായങ്ങളും. സാങ്കേതിക വശങ്ങളിലും മികവ് പുലര്‍ത്തിയിട്ടുണ്ട്. മോഹന്‍ലാലിന്റെ മികച്ച കഥാപാത്രമാണ് എന്നും അഭിപ്രായങ്ങളുണ്ട്. സിനിമയ്ക്ക് സമ്മിശ്ര പ്രതികരണങ്ങള്‍ ഉയരുമ്പോള്‍ 2015ല്‍ എല്‍ജെപി പങ്കുവച്ച ”സോറി ഗയ്സ്.. നോ പ്ലാന്‍സ് ടു ചെയ്ഞ്ച് നോ പ്ലാന്‍സ് ടു ഇംപ്രസ്” എന്ന പോസ്റ്റ് വീണ്ടും ചര്‍ച്ചയാകുന്നുണ്ട്.