മലയാള സിനിമയിൽ ഏറ്റവും കൂടുതൽ ഹിറ്റ് സിനിമകൾ സമ്മാനിച്ച കോമ്പോയാണ് പ്രിയദർശൻ- മോഹൻലാൽ കൂട്ടുകെട്ട്. അവസാനമിറങ്ങിയ മരയ്ക്കാർ അറബിക്കടലിന്റെ സിംഹം വമ്പൻ പ്രീ റിലീസ് ഹൈപ്പുകളോടെയാണ് വന്നതെങ്കിലും പ്രേക്ഷക പ്രീതി പിടിച്ചു പറ്റുന്നതിൽ സിനിമ പരാജയപ്പെട്ടിരുന്നു.
മരയ്ക്കാറിന് ശേഷം പ്രിയൻ- മോഹൻലാൽ കൂട്ടുകെട്ട് വീണ്ടുമൊന്നിക്കുകയാണ്. ചിത്രം പ്രിയദർശന്റെ നൂറാമത്തെ സിനിമയായിരിക്കും. ഗായകൻ എം. ജി ശ്രീകുമാറാണ് പുതിയ ചിത്രത്തിന്റെ കാര്യം ഫേസ്ബുക്കിലൂടെ വെളിപ്പെടുത്തിയത്. പ്രിയദർശനും മോഹൻലാലും എം. ജി ശ്രീകുമാറും ഒരുമിച്ചുള്ള ഒരു പഴയ ക്യാരിക്കേച്ചർ ചിത്രം പങ്കുവെച്ചുകൊണ്ടാണ് എം. ജി ശ്രീകുമാർ ഫേസ്ബുക്കിൽ കുറിച്ചത്.
‘ഹരം’ എന്നായിരിക്കും ചിത്രത്തിന്റെ പേരെന്നാണ് എം. ജി ശ്രീകുമാർ നൽകുന്ന സൂചന. നിരവധി സൂപ്പർ ഹിറ്റ് ഗാനങ്ങൾ മോഹൻലാലിന് വേണ്ടി എം. ജി ശ്രീകുമാർ പാടിയിട്ടുണ്ട്. എന്നാൽ പുതിയ ചിത്രത്തിൽ എന്തായിരിക്കും എം. ജി ശ്രീകുമാറിന്റെ റോൾ എന്ന് വ്യക്തമായിട്ടില്ല. ഗായകനാണോ സംഗീത സംവിധായകനാണോ അഭിനേതാവാണോ എന്ന് ഉറപ്പായിട്ടില്ല.
പുതിയ സിനിമയ്ക്ക് ആശംസകളുമായി ഒരുപാട് പേർ ചിത്രത്തിന് താഴെ കമന്റ് ചെയ്യുന്നുണ്ട്. ചിത്രത്തിന്റെ ഔദ്യോഗിക സ്ഥിതീകരണം വരും ദിവസങ്ങളിൽ ഉണ്ടാവുമെന്ന് പ്രതീക്ഷിക്കുന്നു. ജീത്തു ജോസഫിന്റെ ‘നേര്’ എന്ന ചിത്രത്തിലാണ് മോഹൻലാൽ ഇപ്പോൾ അഭിനയിച്ചുകൊണ്ടിരിക്കുന്നത്. മലൈക്കോട്ടൈ വാലിഭൻ, വൃഷഭ, റാം, ബറോസ് എന്നിവയാണ് മോഹനലാലിന്റെ വരാനിരിക്കുന്ന പ്രധാന സിനിമകൾ. ഇതിൽ മലൈക്കോട്ടൈ വാലിഭൻ അടുത്ത വർഷം ജനുവരി 25 ന് തീയേറ്ററുകളിലെത്തും.