ചെന്നൈയില്‍ ഉദ്ഘാടനത്തിനെത്തിയ നടി മമിത ബൈജുവിനെ പൊതിഞ്ഞ് ആരാധകര്‍. ‘പ്രേമലു’ എന്ന ഒറ്റ ചിത്രം കൊണ്ട് തെന്നിന്ത്യയൊട്ടാകെ ആരാധകരെ സ്വന്തമാക്കിയ നടിയാണ് മമിത ബൈജു. പ്രേമലു തമിഴിലും തെലുങ്കിലുമെല്ലാം ഹിറ്റ് ആയതോടെ നടിക്ക് ഫാന്‍സ് അസോസിയേഷന്‍ വരെ ആരംഭിച്ചിട്ടുണ്ട്.
ചെന്നൈയില്‍ ഉദ്ഘാടനത്തിനെത്തിയ മമിതയെ ആരാധകര്‍ വളയുന്ന വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വൈറലായിക്കൊണ്ടിരിക്കുന്നത്. ചെന്നൈയിലെ ഒരു മാളിലാണ് ഉദ്ഘാടനത്തിനായി മമിത എത്തിയത്. കാലുകുത്താന്‍ പോലും സാധിക്കാത്തത്ര തിരക്കിനിടയില്‍ നില്‍ക്കുന്ന മമിതയുടെ ചിത്രങ്ങള്‍ വൈറലാണിപ്പോള്‍.
View this post on InstagramA post shared by ButterFly Entertainments (@butterfly.entertainments)
അതിരു കടന്ന ആരാധനയില്‍ മുന്നോട്ട് നടക്കാന്‍ കഴിയാതെ മമിത പരിഭ്രമിച്ച് നില്‍ക്കുന്നതും വീഡിയോയില്‍ വ്യക്തമാണ്. സുരക്ഷാ ഉദ്യോഗസ്ഥരും ഒപ്പമുണ്ടായിരുന്ന മറ്റുള്ളവരും ചേര്‍ന്ന് ഏറെ നേരം പണിപ്പെട്ട് ആരാധകരെ നിയന്ത്രിച്ചതിന് ശേഷമാണ് താരത്തിന് മടങ്ങി പോകാന്‍ കഴിഞ്ഞത്.
പ്രേമലുവില്‍ മാത്രമല്ല, തമിഴ് സംവിധായകന്‍ ജി വി പ്രകാശിന്റെ ‘റിബല്‍’ എന്ന ചിത്രത്തിലൂടെ മമിത തമിഴില്‍ അരങ്ങേറ്റം കുറിച്ചിരുന്നു. എന്നാല്‍ ഈ ചിത്രം വന്‍ ഫ്‌ളോപ്പ് ആയി മാറിയിരുന്നു. 2017ല്‍ സര്‍വോപരി പാലാക്കാരന്‍ എന്ന ചിത്രത്തിലൂടെയാണ് മമിത ബൈജു സിനിമയില്‍ എത്തിയത്.