പ്രേക്ഷകര്‍ കാത്തിരിക്കുന്ന മമ്മൂട്ടി ചിത്രങ്ങളില്‍ ഒന്നാണ് ‘ഏജന്റ്’. എന്നാല്‍ ചിത്രത്തിന്റേതായി പുറത്തിറങ്ങിയ ട്രെയ്‌ലറിന് വിമര്‍ശനങ്ങളാണ് ലഭിച്ചത്. മമ്മൂട്ടിയുടെ കഥാപാത്രത്തിന്റെ ശബ്ദത്തിന് രണ്ട് ഡബ്ബിംഗ് വന്നതാണ് ഇതിന് കാരണമായത്.
ട്രെയ്ലറില്‍ മമ്മൂട്ടിയുടെ കേണല്‍ മഹാദേവനെ പ്രാധാന്യത്തോടെ തന്നെ കാണിക്കുന്നുണ്ട്. എങ്കിലും, സംഭാഷണങ്ങളില്‍ ചിലത് മമ്മൂട്ടിയുടെ ശബ്ദത്തിലും ചില ഡയലോഗുകള്‍ മറ്റാരുടെയോ ശബ്ദത്തിലുമാണ്. ഈ വ്യത്യാസം വേഗത്തില്‍ മനസിലാക്കിയ മലയാളി പ്രേക്ഷകര്‍ വിഷയം സോഷ്യല്‍ മീഡിയയില്‍ ചര്‍ച്ചയാക്കി.
‘യാത്ര’യില്‍ സ്വയം ഡബ്ബ് ചെയ്ത മമ്മൂട്ടിയ്ക്ക് ഏജന്റിലും ചെയ്തു കൂടെ എന്നായിരുന്നു ചോദ്യം. അതേസമയം മമ്മൂട്ടി ചിത്രത്തില്‍ ഇരട്ടവേഷം കൈകാര്യം ചെയ്യും എന്ന തരത്തിലും ചര്‍ച്ച എത്തിയിരുന്നു. ഇതോടെ സിനിമയ്ക്കായി വീണ്ടും ഡബ്ബ് ചെയ്യാന്‍ ഒരുങ്ങുകയാണ് മമ്മൂട്ടി.
കേണല്‍ മഹാദേവന്റെ മുഴുവന്‍ സംഭാഷണങ്ങളും മമ്മൂട്ടിയുടെ ശബ്ദഗാംഭീര്യത്തില്‍ തന്നെ കേള്‍ക്കാനാവുമെന്ന് വിശദീകരണം നല്‍കിയിരിക്കുകയാണ് അണിയറ പ്രവര്‍ത്തകര്‍. ചിത്രത്തിന്റെ ഡബ്ബിംഗ് പുനരാരംഭിച്ചിരിക്കുകയാണ് മമ്മൂട്ടി. മൂന്ന് റീല്‍ മാത്രമാണ് അദ്ദേഹം സ്വന്തം കഥാപാത്രത്തിന് ഡബ്ബ് ചെയ്തിരുന്നത്.
ട്രെയിലര്‍ ലോഞ്ചിന്റെ തിയതി നേരത്തെ നിശ്ചയിച്ചിരുന്നതിനാല്‍ മമ്മൂട്ടിയുടെ അഭാവത്തില്‍ മറ്റൊരാളെ വെച്ച് ട്രെയിലറിന് മാത്രമായി ഡബ്ബ് ചെയ്യിക്കുകയായിരുന്നു അണിയറക്കാര്‍. സ്‌ക്രീനില്‍ ചിത്രമെത്തുമ്പോള്‍ മമ്മൂട്ടിയുടെ ശബ്ദത്തില്‍ തന്നെയാവും കേണല്‍ മഹാദേവന്‍ സംസാരിക്കുക.