ടര്‍ബോ ജോസിന് ശേഷം മമ്മൂട്ടിയുടെ ഗംഭീര ആക്ഷന്‍ പടമായാണ് ‘ബസൂക്ക’ ഒരുങ്ങുന്നത്. എന്നാല്‍ സിനിമയ്ക്കായി ഇനിയേറെ നാള്‍ കാത്തിരിക്കേണ്ടി വരും എന്നാണ് റിപ്പോള്‍ട്ടുകള്‍. ബസൂക്കയുടെ റിലീസ് 2025ലേക്ക് നീട്ടിയതായാണ് ഒടിടി പ്ലേ റിപ്പോര്‍ട്ട് ചെയ്യുന്നത്. ചിത്രത്തിന്റെ പോസ്റ്റ് പ്രൊഡക്ഷന്‍ ജോലികള്‍ക്കായി കൂടുതല്‍ സമയം എടുക്കുന്നതിനാലാണ് റിലീസ് നീട്ടിയിരിക്കുന്നത്.
അണിയറപ്രവര്‍ത്തകര്‍ കുറച്ച് ഭാഗങ്ങള്‍ റീഷൂട്ട് ചെയ്യാന്‍ പദ്ധതിയിടുന്നുവെന്നും റിപ്പോര്‍ട്ടുകളുണ്ട്. 2025 മെയ് അവസാനമോ ജൂണ്‍ ആദ്യമോ ചിത്രം റിലീസ് ചെയ്‌തേക്കും എന്നാണ് സൂചന. കലൂര്‍ ഡെന്നീസിന്റെ മകന്‍ ഡിനോ ഡെന്നിസ് ആദ്യമായി സംവിധാനം ചെയ്യുന്ന ചിത്രമാണിത്.
ചിത്രം ഈ വര്‍ഷം ഡിസംബറില്‍ റിലീസ് ചെയ്യുമെന്ന വാര്‍ത്തകള്‍ നേരത്തെ വന്നിരുന്നു. മമ്മൂട്ടിക്കൊപ്പം ഗൗതം മേനോനും ചിത്രത്തില്‍ പ്രധാന കഥാപാത്രമായി എത്തും. സരിഗമ ഇന്ത്യ ലിമിറ്റഡും തിയറ്റര്‍ ഓഫ് ഡ്രീംസിന്റെ ബാനറില്‍ ജിനു വി എബ്രഹാമും ഡോള്‍വിന്‍ കുര്യാക്കോസും ചേര്‍ന്നാണ് ചിത്രം നിര്‍മ്മിക്കുന്നത്.
സിദ്ധാര്‍ഥ് ഭരതന്‍, ബാബു ആന്റണി, ഹക്കീം ഷാജഹാന്‍, ഭാമ അരുണ്‍, ഡീന്‍ ഡെന്നിസ്, സുമിത് നേവല്‍, ദിവ്യാ പിള്ള, സ്ഫടികം ജോര്‍ജ് എന്നിവരും ബസൂക്കയില്‍ പ്രധാന വേഷങ്ങളിലെത്തും. നിമിഷ് രവി ആണ് ഛായാഗ്രാഹകന്‍. എഡിറ്റിങ് നിഷാദ് യൂസഫ്. സംഗീതം മിഥുന്‍ മുകുന്ദ്.