വിശാലിനെയും എസ്.ജെ സൂര്യയെയും കേന്ദ്ര കഥാപാത്രങ്ങളാക്കി ആദിക് രവിചന്ദ്രൻ സംവിധാനം ചെയ്യുന്ന സയൻസ് ഫിക്ഷൻ ചിത്രം ‘മാർക്ക് ആന്റണി’യുടെ ട്രെയ്‌ലര്‍ പുറത്തുവന്നു. ഇന്ത്യൻ സിനിമയിൽ അധികമാരും കൈവെക്കാത്ത ടൈം ട്രാവൽ എന്ന വിഷയത്തെ ആസ്പദമാക്കിയാണ് സിനിമ ഒരുങ്ങുന്നത്. സിൽക്ക് സ്മിതയെ സാങ്കേതികവിദ്യ ഉപയോഗിച്ച് സിനിമയിൽ പുനസൃഷ്ടിച്ചിട്ടുണ്ട് എന്നതും ശ്രദ്ധേയമാണ്.
ഫോണിലൂടെ ടൈം ട്രാവൽ ചെയ്ത് മരണത്തിൽ നിന്നും തിരിച്ചു വരുന്ന ആന്റണി എന്ന ഗ്യാങ്ങ്സ്റ്ററിന്റെ ജീവിതമാണ് ചിത്രം പറയുന്നത്. റിതു വർമ്മയാണ് ചിത്രത്തിൽ നായിക വേഷത്തിലെത്തുന്നത്. അഭിനയ, സെൽവരാഘവൻ, സുനിൽ, മഹേന്ദ്രൻ എന്നിവരാണ് മറ്റ് അഭിനേതാക്കൾ.
വിശാലും എസ്.ജെ സൂര്യയും ചിത്രത്തിൽ ഇരട്ടവേഷത്തിലാണ് എന്നുള്ളതും സിനിമയ്ക്ക് പ്രതീക്ഷകൾ നൽകുന്നു.വിനോദ് കുമാർ നിർമ്മിക്കുന്ന ചിത്രത്തിന് ജി.വി പ്രകാശ് കുമാറാണ് സംഗീതമൊരുക്കിയിരിക്കുന്നത്. ഛായാഗ്രഹണം അഭിനന്ദൻ രാമാനുജം.
സെപ്റ്റംബർ 15 നാണ് സിനിമയുടെ വേൾഡ് വൈഡ് റിലീസ്. പ്രശസ്ത സ്റ്റണ്ട് മാസ്റ്റർ പീറ്റർ ഹൈനാണ് സിനിമയ്ക്ക് വേണ്ടി സംഘട്ടന രംഗങ്ങളൊരുക്കിയിരിക്കുന്നത്.