ആദിക് രവിചന്ദ്രൻ സംവിധാനം ചെയ്ത് വിശാൽ- എസ്. ജെ സൂര്യ കൂട്ടുകെട്ടിലിറങ്ങിയ ടൈം ട്രാവൽ- ഗ്യാങ്ങ്സ്റ്റർ ചിത്രം ‘മാർക്ക് ആന്റണി’ 100 കോടി ക്ലബ്ബിൽ. തിയേറ്ററിൽ റിലീസ് ചെയ്ത് 11 ദിവസങ്ങൾ കൊണ്ടാണ് ചിത്രം ഈ നേട്ടം കൈവരിച്ചിരിക്കുന്നത്.
തുടർച്ചയായ പരാജയ ചിത്രങ്ങൾ കൊണ്ട് നിറഞ്ഞ മുൻവർഷങ്ങളെ അപേക്ഷിച്ച് ഒരു ഹിറ്റ് ചിത്രം എങ്കിലും നേടുക എന്ന വിശാലിന്റെ ആഗ്രഹം കൂടിയാണ് ചിത്രം 100 കോടി ക്ലബ്ബിൽ കയറുന്നതോട് കൂടി നടന്നിരിക്കുന്നത്. 2021 ൽ ഇറങ്ങിയ ‘എനിമി’ വൻ പരാജയമായിരുന്നു, തുടർന്ന് വന്ന ‘ലാത്തി വീരമേ വാഗൈ സൂടും’ എന്ന ചിത്രവും പരാജയം നേടിയപ്പോൾ ഒരുപാട് വിമർശനങ്ങളാണ് താരം നേരിട്ടത്.
അതിനൊക്കെയുള്ള മറുപടി കൂടിയാണ് തന്റെ ഏറ്റവും പുതിയ ചിത്രമായ ‘മാർക്ക് ആന്റണി’യിലൂടെ താരം നൽകിയിരിക്കുന്നത്. ചിത്രത്തിൽ ഒരു ഗാനവും വിശാൽ ആലപിച്ചിട്ടുണ്ട്.
ലിസ്റ്റിൻ സ്റ്റീഫനാണ് ചിത്രം 100 കോടി ക്ലബ്ബിൽ കയറിയത് ഫേസ്ബുക്ക് പോസ്റ്റിലൂടെ അറിയിച്ചിരിക്കുന്നത്. കേരളത്തിൽ ലിസ്റ്റിൻ സ്റ്റീഫനാണ് ചിത്രത്തിന്റെ വിതരണാവകാശം.
അച്ഛന്റെയും മകന്റെയും വേഷത്തിലെത്തിയ എസ്. ജെ സൂര്യയും ചിത്രത്തിൽ മികച്ച പ്രകടനമാണ് കാഴ്ചവെച്ചിരിക്കുന്നത്. ജി. വി പ്രകാശ് കുമാറാണ് ചിത്രത്തിന് സംഗീതമൊരുക്കിയിരിക്കുന്നത്.