കീര്‍ത്തി സുരേഷ് വിവാഹതിയാകുന്നു എന്ന വാര്‍ത്തകളോട് പ്രതികരിച്ച് അമ്മ മേനക സുരേഷ്. 13 വര്‍ഷമായി കീര്‍ത്തി പ്രണയത്തിലാണെന്നും വീട്ടുകാര്‍ ഇപ്പോഴാണ് സമ്മതം മൂളിയത് എന്നായിരുന്നു റിപ്പോര്‍ട്ടുകള്‍ പറഞ്ഞത്. സ്‌കൂള്‍ കാലഘട്ടം മുതല്‍ സുഹൃത്തുക്കളായ ഇവരുടെ വിവാഹം ഉടന്‍ ഉണ്ടാകും എന്നായിരുന്നു വാര്‍ത്തകള്‍ വന്നത്.
കീര്‍ത്തിയുടെ വിവാഹവുമായി ബന്ധപ്പെട്ട് വരുന്ന വാര്‍ത്തകള്‍ വ്യാജമാണെന്നും ഇതിനെ കുറിച്ച് കൂടുതല്‍ പ്രതികരിക്കാനില്ലെന്നും മേനക വ്യക്തമാക്കിയതായാണ് കേരള കൗമുദി റിപ്പോര്‍ട്ട് ചെയ്യുന്നത്. കുറച്ചു നാളുകളായി കീര്‍ത്തിയുടെ വിവാഹത്തെ കുറിച്ചുള്ള നിരവധി റിപ്പോര്‍ട്ടുകള്‍ സോഷ്യല്‍ മീഡിയയില്‍ പ്രചരിക്കുന്നുണ്ടായിരുന്നു.
അടുത്തിടെ കീര്‍ത്തി ഉടന്‍ തന്നെ വിവാഹിതയാകുമെന്നും അതോടെ അഭിനയരംഗം വിട്ടേക്കുമെന്നുമുള്ള റിപ്പോര്‍ട്ടുകളുണ്ടായിരുന്നു. സംഗീത സംവിധായകന്‍ അനിരുദ്ധ് രവിചന്ദറും കീര്‍ത്തിയും പ്രണയത്തിലാണെന്നും ഉടന്‍ വിവാഹിതരാകുമെന്നും റിപ്പോര്‍ട്ടുകള്‍ പ്രചരിച്ചിരുന്നു.
എന്നാല്‍ ഇത് സംബന്ധിച്ച എല്ലാ റിപ്പോര്‍ട്ടുകളും താരം തള്ളിക്കളഞ്ഞിരുന്നു. അതേസമയം, ‘ദശര’, ‘ഭോല ശങ്കര്‍’, ‘മാമന്നന്‍’, ‘സൈറന്‍’, ‘രഘുതാത്ത’, ‘റിവോള്‍വര്‍ റിത’ എന്നീ സിനിമകളാണ് കീര്‍ത്തിയുടെതായി അണിയറയില്‍ ഒരുങ്ങി കൊണ്ടിരിക്കുന്നത്.