മോഹന്‍ലാലിന്റെ ആദ്യ സംവിധാന സംരംഭമായതിനാല്‍ തന്നെ ഏറെ പ്രതീക്ഷയോടെ സിനിമാലോകം കാത്തിരിക്കുന്ന ചിത്രമാണ് ‘ബറോസ്’. 2019ല്‍ ആയിരുന്നു ‘ബറോസ്: ഗാഡിയന്‍ ഓഫ് ഡി ഗാമാസ് ട്രെഷര്‍’ സിനിമ പ്രഖ്യാപിച്ചത്. ചിത്രത്തിന്റെ ലൊക്കേഷനില്‍ നിന്നും ചില ഫോട്ടോകള്‍ പ്രചരിച്ചതല്ലാതെ സിനിമയെ കുറിച്ച് മറ്റ് വിവരങ്ങളൊന്നും ഇതുവരെ പുറത്തുവന്നിട്ടില്ല.
വര്‍ഷങ്ങളുടെ കാത്തിരിപ്പിന് പിന്നാലെ ചിത്രത്തിന്റെ പുതിയൊരു അപ്‌ഡേറ്റുമായി എത്തിയിരിക്കുകയാണ് മോഹന്‍ലാല്‍ ഇപ്പോള്‍. നാളെ വൈകിട്ട് 5 മണിക്ക് ചിത്രത്തിന്റെ ഒരു പ്രധാനപ്പെട്ട അപ്‌ഡേറ്റ് എത്തുമെന്നാണ് മോഹന്‍ലാല്‍ പ്രഖ്യാപിച്ചിരിക്കുന്നത്. ഈ വാര്‍ത്ത സോഷ്യല്‍ മീഡിയ ആഘോഷമാക്കുകയാണ്.
ചിത്രത്തിന്റെ ട്രെയ്‌ലറോ, ടീസറോ, റിലീസ് തീയതിയോ നാളെ പുറത്തുവിട്ടേക്കും എന്നാണ് ആരാധകര്‍ പ്രതീക്ഷിക്കുന്നത്. ബറോസും ‘മലൈകോട്ടൈ വാലിബന്‍’ ചിത്രവും തിയേറ്ററില്‍ ക്ലാഷ് റിലീസ് ആയി എത്തുമെന്ന വാര്‍ത്തകളും നേരത്തെ എത്തിയിരുന്നു. എന്നാല്‍ ഇക്കാര്യത്തില്‍ ഔദ്യോഗിക സ്ഥിരീകരണം ഉണ്ടായിട്ടില്ല.
ഇന്ത്യയിലെ ആദ്യ ത്രീഡി ചിത്രമായിരുന്ന ‘മൈ ഡിയര്‍ കുട്ടിച്ചാത്തന്‍’ സംവിധാനം ചെയ്ത ജിജോയുടെ കഥയെ ആസ്പദമാക്കിയുള്ളതാണ് സിനിമ. ചിത്രത്തിന്റെ പോസ്റ്റ് പ്രൊഡക്ഷന്‍ ജോലികളില്‍ പലതും വിദേശത്താണ് നടക്കുന്നതെന്ന് മോഹന്‍ലാല്‍ നേരത്തെ പറഞ്ഞിരുന്നു.
ബറോസിന് പാശ്ചാത്തല സംഗീതം ഒരുക്കിയത് ഹോളിവുഡ് സംഗീത സംവിധായകന്‍ മാര്‍ക്ക് കിലിയന്‍ ആണ്. പാസ് വേഗ, റാഫേല്‍ അമാര്‍ഗോ എന്നീ സ്പാനിഷ് താരങ്ങളും സിനിമയില്‍ അഭിനയിച്ചിട്ടുണ്ട്. ബറോസ് എന്ന കേന്ദ്ര കഥാപാത്രമായാണ് ചിത്രത്തില്‍ മോഹന്‍ലാല്‍ വേഷമിടുന്നത്.