ലിജോ ജോസ് പെല്ലിശേരിക്കൊപ്പം ‘മലൈകോട്ടൈ വാലിബന്‍’ പൂര്‍ത്തിയാക്കിയാല്‍ മോഹന്‍ലാല്‍ മറ്റൊരു ബിഗ് ബജറ്റ് പ്രോജക്ടിന്റെ ഭാഗമാകും. ‘വൃഷഭ’ എന്ന പാന്‍ ഇന്ത്യന്‍ ചിത്രത്തിന്റെ പുതിയ വിശേഷങ്ങളാണ് ഇപ്പോള്‍ പുറത്തു വന്നിരിക്കുന്നത്.
നന്ദ കിഷോര്‍ സംവിധാനം ചെയ്യുന്ന ചിത്രത്തിന്റെ തിരക്കഥ പൂര്‍ത്തിയായിരിക്കുകയാണ്. ചിത്രത്തിന്റെ ഷൂട്ടിംഗ് ഉടനെ ആരംഭിക്കാനാണ് സാധ്യത. ആക്ഷനും ഇമോഷനും ചേര്‍ന്ന ബഹുഭാഷ ചിത്രമായിരിക്കും ഇതെന്ന് മോഹന്‍ലാല്‍ തന്നെ നേരത്തെ തുറന്നു പറഞ്ഞിരുന്നു.
മലൈകോട്ടൈ വാലിബന്റെ ചിത്രകരണവുമായി ബന്ധപ്പെട്ട് രാജസ്ഥാനിലാണ് മോഹന്‍ലാല്‍ ഉള്ളത്. എന്നാല്‍ ഈ ചിത്രത്തിന്റെ ഷൂട്ട് കഴിഞ്ഞാലുടന്‍ മോഹന്‍ലാല്‍ വൃഷഭയില്‍ ജോയിന്‍ ചെയ്യില്ല എന്നാണ് റിപ്പോര്‍ട്ടുകള്‍. ജീത്തു ജോസഫ് സംവിധനം ചെയ്യുന്ന ‘റാം’ സിനിമയില്‍ അഭിനയിച്ച ശേഷമായിരിക്കും താരം വൃഷഭയുടെ സെറ്റിലെത്തുക.
‘സ്ഫടിക’മാണ് മോഹന്‍ലാലിന്റേതായി ഒടുവില്‍ തിയേറ്ററുകളില്‍ എത്തിയത്. മോഹന്‍ലാലിന്റെ എക്കാലത്തെയും ഹിറ്റ് ചിത്രങ്ങളില്‍ ഒന്നായ ‘സ്ഫടികം’ റീ മാസ്റ്റര്‍ ചെയ്ത് വീണ്ടും റിലീസ് ചെയ്യുകയായിരുന്നു. റീ റിലീസ് ചിത്രമാണെങ്കിലും ദിവസങ്ങള്‍ക്കുള്ളില്‍ തന്നെ സിനിമ മൂന്ന് കോടി കളക്ഷന്‍ നേടിയിരുന്നു.