മകള്‍ വിസ്മയയുടെ “ഗ്രെയിന്‍സ് ഓഫ് സ്റ്റാര്‍ഡസ്റ്റ്” എന്ന പുസ്തകം ബെസ്റ്റ് സെല്ലറായതിന്റെ സന്തോഷം പങ്കുവെച്ച് മോഹന്‍ലാല്‍. സോഷ്യല്‍ മീഡിയയില്‍ പങ്കുവെച്ച പോസ്റ്റിലാണ് താരം സന്തോഷം അറിയിച്ചിരിക്കുന്നത്. വാലന്റൈന്‍സ് ദിനത്തില്‍ പുസ്തകം ഇന്ത്യയിലെ ബുക്ക് സ്റ്റാളുകളില്‍ ലഭ്യമാകും.
അതേസമയം, പോസ്റ്റിന് താഴെ എത്തിയ നിര്‍മ്മാതാവ് ജോബി ജോര്‍ജിന്റെ കമന്റ് ആണ് വൈറലാകുന്നത്. പുസ്തകത്തിന്റെ 10 കോപ്പി എനിക്ക് വേണം എന്നാണ് ജോബി ജോര്‍ജിന്റെ കമന്റ്. ഇതോടെ മറുപടി കമന്റുകളുമായി പ്രേക്ഷകരും എത്തി. എന്തിനാണ് പത്തു കോപ്പി എന്നാണ് ചോദ്യങ്ങള്‍.
ഇതോടെ നിര്‍മ്മാതാവിന്റെ മറുപടിയും എത്തി. ഒന്ന് എനിക്കും ബാക്കി ഗിഫ്റ്റ് കൊടുക്കാനും എന്നാണ് ജോബി ജോര്‍ജിന്റെ മറുപടി. അതേസമയം, പൊതുയിടങ്ങളില്‍ അത്ര സജീവമല്ലാത്ത വിസ്മയയുടെ സ്വപ്‌നസാക്ഷാത്കാരമാണ് ഈ പുസ്തകം. മോഹന്‍ലാലും സഹോദരന്‍ പ്രണവും വിസ്മയക്ക് ആശംസകളുമായി എത്തിയിട്ടുണ്ട്.
ജാപ്പനീസ് ഹൈക്കു കവിതകളില്‍ നിന്ന് പ്രചോദനം ഉള്‍ക്കൊണ്ട് വിസ്മയ എഴുതിയ എഴുപതിലധികം കുറുങ്കവിതകളും അതിനനുസരിച്ച് വരച്ച ചിത്രങ്ങളും ചേര്‍ന്നതാണ് പുസ്തകം. വിസ്മയയുടെ ആദ്യപുസ്തകമാണിത്.