സുരാജ് വെഞ്ഞാറമൂടിന്റെ ഡ്രൈവിംഗ് ലൈസൻസ് സസ്പെന്റ് ചെയ്യാനൊരുങ്ങി മോട്ടോർ വാഹന വകുപ്പ്; മൂന്ന് തവണ നോട്ടീസ് അയച്ചിട്ടും മറുപടി ലഭിച്ചില്ല

നടൻ സുരാജ് വെഞ്ഞാറമൂടിന്റെ ഡ്രൈവിങ് ലൈസൻസ് സസ്പെൻഡ് ചെയ്യാനുള്ള നടപടിയുമായി മോട്ടോർ വാഹന വകുപ്പ്.

അമിത വേഗതയിൽ കാറോടിക്കുകയും ബൈക്ക് യാത്രക്കാരനെ ഇടിച്ച് പരിക്കേൽപ്പിക്കുകയും ചെയ്ത സംഭവത്തിലാണ് നടപടി. ലൈസൻസ് സസ്പന്റ് ചെയ്യാതിരിക്കാനുള്ള മതിയായ കാരണ ങ്ങളുണ്ടെങ്കിൽ ബോധിപ്പിക്കുവാൻ മോട്ടോർ വാഹന വകുപ്പ് താരത്തിന് മുൻപ് പലതവണ നോട്ടീസ് അയച്ചിരുന്നു.

മൂന്ന് തവണയും മറുപടി ലഭിക്കാത്തതിനെ തുടർന്നാണ് ഇപ്പോൾ താരത്തിന്റെ ലൈസൻസ് സസ്പന്റ് ചെയ്യാനുള്ള തീരുമാനത്തിലേക്ക് എത്തിയിരിക്കുന്നത്.

കഴിഞ്ഞ വർഷം ജൂലൈ 29-ന് തമ്മനം- കാരണക്കോടം റോഡിൽ വെച്ചായിരുന്നു അപകടം നടന്നത്. സുരാജ് ഓടിച്ച കാർ ബൈക്കിൽ ഇടിച്ചു മഞ്ചേരി സ്വദേശി ശരത്തിന്റെ വലതു കാലിലെ പെരുവിരലിന്റെ അസ്ഥി ഒടിയുകയും സാരമായി പരിക്കേൽക്കുകയും ചെയ്തിരുന്നു.