കലാഭവന്‍ മണിയുടെ പാട്ടുകള്‍ക്ക് ഈണം നല്‍കി പ്രശസ്തനായ സംഗീത സംവിധായകന്‍ സിദ്ധാര്‍ഥ് വിജയന്‍ അന്തരിച്ചു. കൊച്ചിയിലെ സ്വകാര്യ ആശുപത്രിയില്‍ ചൊവ്വാഴ്ച രാവിലെയായിരുന്നു അന്ത്യം. 65 വയസായിരുന്നു. സംസ്‌കാരം വൈകിട്ട് നാലിന് മുരുക്കുംപാടം ശ്മശാനത്തില്‍ നടക്കും.
കലാഭവന്‍ മണിയുടെ 45 ആല്‍ബങ്ങള്‍ക്കായി അഞ്ഞൂറോളം ഗാനങ്ങളാണ് സിദ്ധാര്‍ഥ് വിജയന്‍ ഒരുക്കിയത്. 1983-ല്‍ സുജാതയും മാര്‍ക്കോസും ചേര്‍ന്ന് ആലപിച്ച “അത്തപ്പൂക്കളം” ആണ് ആദ്യ ആല്‍ബം. തുടര്‍ന്ന് മാഗ്‌നാ സൗണ്ട്, ഗീതം കാസറ്റ്, ഈസ്റ്റ് കോസ്റ്റ്, സിബിഎസ് എന്നിവയ്ക്കായി ഗിരീഷ് പുത്തഞ്ചേരിയുടെ വരികള്‍ ചിട്ടപ്പെടുത്തി.
“സ്വാമി തിന്തകത്തോം” എന്ന അയ്യപ്പഭക്തിഗാന ആല്‍ബത്തിനുവേണ്ടി 1999-ലാണ് മണിയുമായി ആദ്യമായി ഒന്നിക്കുന്നത്. തുടര്‍ന്ന് 11 അയ്യപ്പഭക്തിഗാന കാസറ്റുകള്‍ ഇറക്കി. “മകരപ്പുലരി”യാണ് അവസാന കാസറ്റ്. കൂടാതെ നാടന്‍പാട്ടുകളുടെ 10 കാസറ്റുകള്‍, ചാലക്കുടിക്കാരന്‍ ചങ്ങാതി, അമ്മ ഉമ്മ മമ്മി, മണിച്ചേട്ടാ നിമ്മി വിളിക്കുന്നു എന്നീ കോമഡി ആല്‍ബങ്ങളും ഉള്‍പ്പെടെ 45 കാസറ്റുകള്‍ മണിക്കായി ഒരുക്കിയിരുന്നു.
മൂന്ന് മലയാള സിനിമയ്ക്കും നിരവധി തമിഴ് മലയാളം റീമേക്കുകള്‍ക്കും കാസറ്റുകള്‍ക്കും സിദ്ധാര്‍ഥ് വിജയന്‍ സംഗീതം ഒരുക്കിയിട്ടുണ്ട്. മൂവായിരത്തോളം ഗാനങ്ങള്‍ക്ക് ഈണമിട്ടുണ്ട്.