ജോഷിയുടെ സംവിധാനത്തില്‍ എത്തിയ ‘പൊറിഞ്ചു മറിയം ജോസ്’ തെലുങ്കിലേക്ക്. 2019ല്‍ എതതിയ ചിത്രത്തില്‍ ജോജു ജോര്‍ജ്, നൈല ഉഷ, ചെമ്പന്‍ വിനോദ് എന്നിവരാണ് കേന്ദ്ര കഥാപാത്രങ്ങളായി എത്തിയത്. ജോജു അവതരിപ്പിച്ച നായക കഥാപാത്രത്തെ തെലുങ്കില്‍ നാഗര്‍ജുന അവതരിപ്പിക്കും എന്നാണ് റിപ്പോര്‍ട്ടുകള്‍.
ചിത്രത്തിനായി നാഗാര്‍ജുനയെ അണിയറ പ്രവര്‍ത്തകര്‍ സമീപിച്ചതായും താരം സമ്മതം മൂളിയെന്നുമാണ് റിപ്പോര്‍ട്ടുകള്‍. തെലുങ്ക് തിരക്കഥാകൃത്ത് പ്രസന്ന കുമാര്‍ ആണ് ചിത്രത്തിന്റെ റീമേക്ക് സംവിധാനം ചെയ്യുന്നത്. പ്രസന്ന കുമാറിന്റെ ആദ്യ സംവിധാന സംരംഭം കൂടിയാണിത്.
ശ്രീനിവാസ ചിട്ടൂരിയാണ് ചിത്രത്തിന്റെ നിര്‍മ്മാണം. നൈലയും ചെമ്പന്‍ വിനോദും അവതരിപ്പിച്ച കഥാപാത്രങ്ങള്‍ ആരൊക്കെയാവും അവതരിപ്പിക്കുക എന്നതില്‍ വ്യക്തതയില്ല. അതേസമയം, ഈ വര്‍ഷം റിലീസ് ചെയ്ത നാഗാര്‍ജുന ചിത്രങ്ങള്‍ക്ക് മികച്ച പ്രതികരണം നേടാന്‍ സാധിച്ചിരുന്നില്ല.
ജനുവരിയില്‍ റിലീസ് ചെയ്ത നാഗാര്‍ജുന പ്രധാന വേഷത്തിലെത്തിയ ചിത്രം ‘ബംഗരാജു’ ബോക്‌സോഫീസില്‍ പരാജയം നേരിട്ടിരുന്നു. തുടര്‍ന്ന് ഒക്ടോബറില്‍ റിലീസ് ചെയ്ത ‘ദി ഗോസ്റ്റ്’ എന്ന ചിത്രത്തിനും വിജയം നേടാനായിരുന്നില്ല.