ഈ വര്‍ഷം നടന്ന ഗംഭീര താരവിവാഹങ്ങളിലൊന്നായിരുന്നു നയന്‍താര-വിഘ്‌നേഷ് ശിവന്‍ ജോഡികളുടേത്. ഇപ്പോഴിതാ വിവാഹച്ചടങ്ങിലെ കൂടുതല്‍ ചിത്രങ്ങള്‍ പുറത്ത് വന്നിരിക്കുകയാണ്. അതിഥികളായി എത്തിയ ഷാറുഖ് ഖാന്‍, രജനീകാന്ത്, മണിരത്‌നം എന്നിവര്‍ക്കൊപ്പമുള്ള നയന്‍സിന്റെയും വിഘ്‌നേഷിന്റെയും ചിത്രങ്ങളാണ് പുറത്തുവിട്ടിരിക്കുന്നത്. വിവാഹം കഴിഞ്ഞ് ഒരുമാസം പൂര്‍ത്തിയാകുന്ന അവസരത്തില്‍ വിഘ്‌നേഷ് തന്നെയാണ് ചിത്രങ്ങള്‍ ആരാധകര്‍ക്കായി പങ്കുവച്ചത്.
ജൂണ്‍ ഒന്‍പതിനായിരുന്നു ഇരുവരുടെയും വിവാഹം. കാരണവസ്ഥാനത്തു നിന്ന രജനീകാന്തിന്റെ അനുഗ്രഹം ഏറ്റുവാങ്ങി. മഹാബലിപുരത്തെ ഷെറാട്ടണ്‍ ഗ്രാന്‍ഡ് റിസോര്‍ട്ടിലെ വേദിയില്‍ ഗ്ലാസ് കൂടാരത്തിന്റെ മാതൃകയില്‍ ഒരുക്കിയ പന്തലില്‍ രാവിലെ ഏഴരയ്ക്കായിരുന്നു ചടങ്ങുകള്‍ ആരംഭിച്ചത്.
താലിയെടുത്തു നല്‍കിയതു രജനികാന്താണ്. ബോളിവുഡ് സൂപ്പര്‍ സ്റ്റാര്‍ ഷാറുഖ് ഖാന്‍, നടന്മാരായ ദിലീപ്, സൂര്യ, വിജയ് സേതുപതി, കാര്‍ത്തി, ശരത് കുമാര്‍, സംവിധായകരായ മണിരത്‌നം, കെ.എസ്.രവികുമാര്‍, നിര്‍മാതാവ് ബോണി കപൂര്‍ തുടങ്ങിയവര്‍ പങ്കെടുത്തു.
വിവാഹച്ചടങ്ങുകളുടെ ചിത്രീകരണ അവകാശം ഒടിടി കമ്പനിക്കു നല്‍കിയിരുന്നതിനാല്‍ അതിഥികളുടെ മൊബൈല്‍ ഫോണ്‍ ക്യാമറകള്‍ ഉള്‍പ്പെടെ സ്റ്റിക്കര്‍ പതിച്ചു മറച്ചിരുന്നു.