കുഞ്ചാക്കോ ബോബന്‍, ജോജു ജോര്‍ജ്, നിമിഷ സജയന്‍ എന്നിവരെ കേന്ദ്ര കഥാപാത്രങ്ങളാക്കി മാര്‍ട്ടിന്‍ പ്രക്കാട്ട് ഒരുക്കിയ ചിത്രം “നായാട്ടി”ലെ “”നരബലി”” എന്ന ഗാനം ശ്രദ്ധ നേടുന്നു. മലയാളി റാപ്പര്‍ വേടന്‍ ആലപിച്ച ഗാനത്തിന് മികച്ച പ്രതികരണങ്ങളാണ് ലഭിക്കുന്നത്. ഷാഹി കബീര്‍ തിരക്കഥ ഒരുക്കിയ ചിത്രം സര്‍വൈവല്‍ ത്രില്ലര്‍ ആയാണ് എത്തിയത്.
ഏപ്രില്‍ 8ന് റിലീസ് ചെയ്ത ചിത്രം മികച്ച പ്രതികരണങ്ങളാണ് നേടിയത്. നായാട്ടുകാരുടെ കഥയല്ല, വേട്ടയാടപ്പെടുന്ന ഇരകളുടെ കഥയാണ് ചിത്രം എന്നാണ് പ്രേക്ഷകര്‍ ഒന്നടങ്കം പറയുന്നത്. സമകാലിക കേരളത്തെയാണ് നായാട്ട് പശ്ചാത്തലമാക്കിയിരിക്കുന്നത്. ഷൈജു ഖാലിദ് ആണ് ഛായാഗ്രഹണം.
മഹേഷ് നാരായണന്‍, രാജേഷ് രാജേന്ദ്രന്‍ എന്നിവര്‍ ചേര്‍ന്നാണ് എഡിറ്റിംഗ് നിര്‍വഹിച്ചിരിക്കുന്നു. അന്‍വര്‍ അലി എഴുതിയ വരികള്‍ ഈണമിട്ടിരിക്കുന്നത് വിഷ്ണു വിജയ് ആണ്. മാര്‍ട്ടിന്‍ പ്രക്കാട്ട് ഫിലിംസിന്റെയും, ഗോള്‍ഡ് കോയിന്‍ മോഷന്‍ പിക്ച്ചര്‍ കമ്പനിയുടെയും ബാനറില്‍ രഞ്ജിത്തും, പി എം ശശിധരനും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.
മാര്‍ട്ടിന്‍ പ്രക്കാട്ടിന്റെ മുന്‍കാല സിനിമകളില്‍ നിന്നെല്ലാം മാറി നില്‍ക്കുന്ന ചിത്രമാണ് നായാട്ട് എന്നാണ് ചിത്രത്തെ കുറിച്ച് കുഞ്ചാക്കോ ബോബന്‍ വ്യക്തമാക്കിയത്. ചിത്രത്തിന്റെ കഥ കേട്ട ശേഷം സിനിമയിലെ പ്രവീണ്‍ മൈക്കിള്‍ എന്ന പോലീസ് കഥാപാത്രം ചോദിച്ചു വാങ്ങുകയായിരുന്നു എന്നും താരം മാതൃഭൂമിയുടെ അഭിമുഖത്തില്‍ പറഞ്ഞിരുന്നു.