സര്‍ക്കാര്‍, നോട്ട, ഉറിയടി 2എന്നീ ചിത്രങ്ങള്‍ക്ക് പിന്നാലെ രാഷ്ട്രീയം പറയുന്ന മറ്റൊരു സിനിമ കൂടി തമിഴകത്ത് വരുന്നു. സൂര്യ നായകനായെത്തുന്ന എന്‍ജികെ. ആരാധകരും സിനിമാലോകവും ഏറെ പ്രതീക്ഷയോടെ കാത്തിരിക്കുന്ന ചിത്രത്തിന്റെ ട്രെയിലര്‍ അണിയറപ്രവര്‍ത്തകര്‍ പുറത്തുവിട്ടു. മികച്ച ഒരു പൊളിറ്റിക്കല്‍ ത്രില്ലറായിരിക്കും ചിത്രമെന്ന സൂചനയാണ് ട്രെയിലര്‍ നല്‍കുന്നത്. പുറത്തുവിട്ട് മണിക്കൂറുകള്‍ക്കുള്ളില്‍ തന്നെ ട്രെയിലര്‍ ട്രെന്‍ഡിംഗില്‍ ഒന്നാമതെത്തി. കുറച്ച് നാളുകള്‍ക്ക് മുമ്പ് പുറത്തിറങ്ങിയ ടീസര്‍ യൂട്യൂബില്‍ ഒമ്പത് മില്യണ്‍ വ്യൂസ് നേടി വന്‍ ഹിറ്റായിരുന്നു.
സൂര്യക്ക് പുറമെ സായ് പല്ലവി, രകുല്‍പ്രീത് തുടങ്ങിയവരും ചിത്രത്തിലുണ്ട്. പൊളിറ്റിക്സും ആക്ഷനും റൊമാന്‍സുമെല്ലാം നിറഞ്ഞൊരു മാസ് ചിത്രമായിരിക്കും എന്‍ജികെ എന്ന് ട്രെയിലര്‍ വ്യക്തമാക്കുന്നുണ്ട്.
സായി പല്ലവി, രകുല്‍ പ്രീത് സിങ് എന്നിവരാണ് ചിത്രത്തിലെ നായികമാര്‍. യുവന്‍ ശങ്കര്‍ രാജയാണ് ചിത്രത്തിന്റെ സംഗീതം. എസ്ആര്‍ പ്രകാശ് ബാബു ആന്റ് എസ്.ആര്‍.പ്രഭുവും ചേര്‍ന്നാണ് നിര്‍മ്മാണം. തമിഴ് സിനിമ രംഗത്ത് എന്നും വ്യത്യസ്തമായ വിഷയങ്ങള്‍ ഏറ്റെടുത്തിട്ടുളള സംവിധായകന്‍ സെല്‍വരാഘവനുമൊത്ത് സൂര്യയുടെ ആദ്യ ചിത്രമാണിത്. 2013 ല്‍ പുറത്തിറങ്ങിയ രണ്ടാം ഉലകം ആണ് ഇദ്ദേഹത്തിന്റെ അവസാനമായി പുറത്തിറങ്ങിയ ചിത്രം.
