നിവിൻ പോളി, ആസിഫ് അലി എന്നിവര്രെ കേന്ദ്രകഥാപാത്രങ്ങളാക്കി എബ്രിഡ് ഷൈൻ സംവിധാനം ചെയ്യുന്ന ചിത്രമാണ് മഹാവീര്യർ. ഫസ്റ്റ് ലുക്ക് പോസ്റ്റർ മുതൽ പ്രേക്ഷകരിൽ കൗതുകമുണർത്തിയിരുന്ന ചിത്രം നാളെ തിയേറ്ററുകളിലേക്ക് എത്തുകയാണ്. ഫാന്റസി ടൈംട്രാവൽ ജോണറിലെത്തുന്ന ചിത്രത്തിന്റെ പ്രീബുക്കിങ്ങ് ഇന്ന് ആരംഭിച്ചിരുന്നു.
പോളി ജൂനിയർ പിക്ചേഴ്സ്‌, ഇന്ത്യൻ മൂവി മേക്കേഴ്സ് എന്നീ ബാനറുകളിൽ നിവിൻ പോളി, പി. എസ് ഷംനാസ് എന്നിവർ ചേർന്നാണ് ചിത്രം നിർമ്മിക്കുന്നത്. എം. മുകുന്ദന്റെ കഥയ്ക്ക് തിരക്കഥയൊരുക്കുന്നത് എബ്രിഡ് ഷൈനാണ്.
നിവിൻ പോളിയും ആസിഫ് അലിയും കൂടാതെ, ലാൽ, ലാലു അലക്സ്, സിദ്ധിഖ്, ഷാൻവി ശ്രീവാസ്തവ, വിജയ് മേനോൻ, മേജർ രവി, മല്ലിക സുകുമാരൻ, സുധീർ കരമന, കൃഷ്ണ പ്രസാദ് എന്നിവരും പ്രധാന കഥാപാത്രത്തിലെത്തുന്നുണ്ട്.
ടൈം ട്രാവലും ഫാന്റസിയും കോടതിയും നിയമ വ്യവഹാരങ്ങളും മുഖ്യ പ്രമേയമായിരിക്കുന്ന ഈ ചിത്രം, നർമ്മ – വൈകാരിക മുഹൂർത്തങ്ങൾക്കും പ്രാധാന്യം നൽകിയിരിക്കുന്നു.
നീണ്ട രണ്ട് വർഷത്തെ ഇടവേളയ്ക്ക് ശേഷം തിയേറ്ററിലേത്തുന്ന നിവിൻ പോളി ചിത്രം കൂടിയാണ് മഹാവീര്യർ. കോവിഡ് സാഹചര്യം കണക്കിലെടുത്ത് നിവിൻ്റെ കനകം കാമിനി കലഹം എന്ന ചിത്രം ഒടിടി വഴിയാണ് റീലീസ് ചെയ്തത്.
തുറമുഖമാണ് ഇനി നിവിൻ്റെതായി പുറത്തിറങ്ങാനുള്ള ചിത്രം. ഏഴ് വർഷത്തിനു ശേഷം നിവിൻ പോളിയും ആസിഫ് അലിയും ഒന്നിക്കുന്ന ചിത്രം എന്ന പ്രേത്യകതയും മഹാവീര്യർക്ക് ഉണ്ട്.
സംസ്ഥാന അവാർഡ് ജേതാവായ ചന്ദ്രു സെൽവരാജാണ് മഹാവീര്യർക്ക് ഛായാഗ്രഹണം നിർവഹിച്ചിരിക്കുന്നത്. ചിത്രത്തിന് ഇഷാൻ ചാബ്ര സംഗീതവും പശ്ചാത്തല സംഗീതവും ഒരുക്കിയിരിക്കുന്നു.
ചിത്രസംയോജനം – മനോജ്‌, ശബ്ദ മിശ്രണം – വിഷ്ണു ഗോവിന്ദ്, ശ്രീ ശങ്കർ, കലാ സംവിധാനം – അനീസ് നാടോടി, വസ്ത്രാലങ്കാരം – ചന്ദ്രകാന്ത്, മെൽവി. ജെ, ചമയം – ലിബിൻ മോഹനൻ, മുഖ്യ സഹ സംവിധാനം – ബേബി പണിക്കർ തുടങ്ങിയവരാണ് മറ്റ് അണിയറ പ്രവർത്തകർ.