കാത്തിരിപ്പുകൾക്ക് വിരാമമിട്ട് സുരേഷ് ഗോപി ചിത്രം പാപ്പന്റെ ഒടിടി റീലിസിങ്ങ് പ്രഖ്യാപിച്ചു. പ്രമുഖ ഒടിടി പ്ലാറ്റ്ഫോം ആയ സീ 5 ലൂടെ ആയിരിക്കും ചിത്രം എത്തുക. ഉത്രാട ദിനമായ സെപ്റ്റംബർ 7 ന് ചിത്രം റീലിസ് ചെയ്യുക. നീണ്ട ഇടവേളയ്ക്ക് ശേഷം ബോക്സ് ഓഫീസിൽ സുരേഷ് ഗോപിക്ക് വമ്പൻ തിരിച്ചുവരവ് നൽകിയ ചിത്രമാണ് ജോഷിയുടെ സംവിധാനത്തിൽ എത്തിയ പാപ്പൻ.
ക്രൈം ത്രില്ലർ വിഭാഗത്തിൽ പെടുന്ന ചിത്രം ജൂലൈ 29 ന് ആണ് തിയറ്ററുകളിൽ എത്തിയത്. സീ കേരളമാണ് ചിത്രത്തിൻറെ ഒടിടി, സാറ്റലൈറ്റ് അവകാശങ്ങൾ വൻ തുകയ്ക്ക് സ്വന്തമാക്കിയിരിക്കുന്നത്. സുരേഷ് ഗോപിയുടെ താരപ്രഭാവം നന്നായി ഉപയോഗപ്പെടുത്തിയാണ് ചിത്രം പ്രേക്ഷകരുടെ പ്രിയം നേടിയെടുത്തത്.
പൊറിഞ്ചു മറിയം ജോസിനു ശേഷം ജോഷിയുടെ സംവിധാനത്തിൽ എത്തിയ ചിത്രവുമാണ് പാപ്പൻ. ആർ ജെ ഷാനിയായിരുന്നു രചന. എബ്രഹാം മാത്യു മാത്തൻ എന്നാണ് കഥാപാത്രത്തിൻറെ പേര്.
‘സലാം കാശ്‍മീരി’നു ശേഷം ജോഷിയും സുരേഷ് ഗോപിയും ഒന്നിക്കുന്ന ചിത്രവുമാണിത്. ലേലം, പത്രം, വാഴുന്നോർ തുടങ്ങി ഈ കോമ്പിനേഷനിൽ പുറത്തെത്തിയ ചിത്രങ്ങളിൽ പലതും സൂപ്പർഹിറ്റുകൾ ആയിരുന്നു.