നൂറിന്‍ ഷെരീഫ് നായികയാവുന്ന പുതിയ ചിത്രത്തിന്റെ പോസ്റ്റര്‍ ഇന്‍സ്റ്റാഗ്രാം അക്കൗണ്ടിലൂടെ ഷെയര്‍ ചെയ്ത ഒമര്‍ ലുലുവിനെ ആദരിച്ച് നൂറിന്‍ ഷെരീഫ്. പ്രവീണ്‍ രാജ് പൂക്കാടന്‍ സംവിധാനം ചെയ്യുന്ന “വെള്ളേപ്പ”ത്തിന്റെ പോസ്റ്ററാണ് ഒമര്‍ ലുലു ഷെയര്‍ ചെയ്തത്. പോസ്റ്റില്‍ “ഗോഡ്ഫാദര്‍” എന്ന സംബോധനയാണ് നൂറിന്‍ ഒമര്‍ ലുലുവിന് നല്‍കിയത്.
ഒമര്‍ ലുലു സംവിധാനം ചെയ്ത “ഒരു അഡാര്‍ ലവ്വി”ലൂടെ ശ്രദ്ധിക്കപ്പെട്ട നൂറിന്‍ ഷെരീഫ് ഇന്ന് ഏറെ തിരക്കുള്ള നായികയാണ്. ഒമര്‍ ലുലുവിന്റെ ചിത്രത്തിലൂടെ അരങ്ങേറ്റം സാധ്യമായി എന്നതിനുള്ള നന്ദി സൂചകമായാണ് നൂറിന്‍ ഇപ്രകാരം കമന്റ് ചെയ്തത്. നൂറിന്‍ ഷെരീഫിന്റെ ഈ കമന്റ് സോഷ്യല്‍ മീഡിയയില്‍ ചര്‍ച്ചയായിട്ടുണ്ട്. ഒമര്‍ ലുലുവിന്റെ ക്രിസ്തുമസ് ചിത്രമായ ധമാക്കയില്‍ നൂറിനും അഭിനയിക്കുന്നുണ്ടെന്നാണ് സൂചന.
https://www.instagram.com/p/B49vq5SHPY9/?utm_source=ig_web_copy_link
ഒളിമ്പ്യന്‍ അന്തോണി ആദം എന്ന ചിത്രത്തില്‍ മോഹന്‍ലാലിനൊപ്പം ടോണി ഐസക് എന്ന കഥാപാത്രത്തെ മനോഹരമാക്കിയ അരുണാണ് ധമാക്കയില്‍ നായകന്. ഒമര്‍ ലുലുവിന്റെ നാലാമത്തെ ചിത്രമായ ധമാക്കയില്‍ സലിം കുമാര്‍, ഇന്നസെന്റ്, സാബുമോന്‍, മുകേഷ്, ഉര്‍വ്വശി, നിക്കി ഗല്‍റാണി, നേഹ, ഹരീഷ് കണാരന്‍, ധര്‍മജന്‍ ബോള്‍ഗാട്ടി, ഷാലിന്‍ സോയ തുടങ്ങി വന്‍താരനിരയാണ് അണിനിരക്കുന്നത്.
ഗുഡ് ലൈന്‍ പ്രൊഡക്ഷന്‍സ് അവതരിപ്പിക്കുന്ന ധമാക്ക എം കെ നാസര്‍ ആണ് നിര്‍മ്മിക്കുന്നത്. സാരംഗ് ജയപ്രകാഷ്, വേണു ഓവി കിരണ്‍ ലാല്‍ എന്നിവര്‍ ചേര്‍ന്നാണ് തിരക്കഥയും സംഭാഷണവും ഒരുക്കുന്നത്. ഗോപി സുന്ദര്‍ ആണ് സംഗീതം. ഛായാഗ്രഹണം സിനോജ് പി അയ്യപ്പന്‍. ചിത്രം ഡിസംബര്‍ 20 ന് തിയേറ്ററുകളിലെത്തും.