ടൊവിനോ തോമസ് നായകനായെത്തുന്ന ‘അന്വേഷിപ്പിന്‍ കണ്ടെത്തും’ എന്ന ചിത്രത്തിന്റെ പൂജ കഴിഞ്ഞു. കോട്ടയം തിരുന്നക്കര ക്ഷേത്രത്തില്‍ വച്ചായിരുന്നു സിനിമയുടെ ചടങ്ങുകള്‍. സ്വിച്ച് ഓണ്‍ കര്‍മ്മം സംവിധായകന്‍ ഭദ്രന്‍ നിര്‍വഹിച്ചു. ചിത്രത്തിന്റെ ഫസ്റ്റ് ക്ലാപ് ഡയറക്ടര്‍ വൈശാഖ് നിര്‍വഹിച്ചു. നവാഗതനായ ഡാര്‍വിന്‍ കുര്യാക്കോസ് ആണ് ചിത്രം സംവിധാനം ചെയ്യുന്നത്.
ജോണി ആന്റണി, ജിനു.വി. ഏബ്രഹാം എന്നിവരുടെ സഹ സംവിധായകനായി പ്രവര്‍ത്തിച്ചു കൊണ്ടാണ് ഡാര്‍വിന്‍ കുര്യാക്കോസ് സ്വതന്ത്ര സംവിധാനത്തിലേക്കെത്തുന്നത്. തീയേറ്റര്‍ ഓഫ് ഡ്രീംസിന്റെ ബാനറില്‍ ഡോള്‍വിന്‍ കുര്യാക്കോസ്, പ്രശസ്ത തിരക്കഥാ കത്ത് ജിനു.വി. ഏബ്രഹാം എന്നിവരാണ് ഈ ചിത്രം നിര്‍മ്മിക്കുന്നത്.
കാപ്പയുടെ മികച്ച വിജയത്തിനു ശേഷം തീയേറ്റര്‍ ഓഫ് ഡ്രീംസ് നിര്‍മ്മിക്കുന്ന ചിത്രം കൂടിയാണിത്. ഈ സിനിമയുടെ ചിത്രീകരണം മാര്‍ച്ച് ആറ് തിങ്കളാഴ്ച്ച കോട്ടയത്ത് ആരംഭിക്കും. വന്‍ താരനിരയും സംഭവ ബഹുലങ്ങളായ നിരവധി മുഹൂര്‍ത്തങ്ങളും കോര്‍ത്തിണക്കി വിശാലമായ ക്യാന്‍വാസ്സിലാണ് ഈ ചിത്രത്തിന്റെ അവതരണം. ടൊവിനോയുടെ കരിയറിലെ വലിയ മുതല്‍ മുടക്കില്‍ ഒരുങ്ങുന്ന ബിഗ് ബഡ്ജറ്റ് ചിത്രം കൂടിയായിരിക്കും ഇത്. ‘അജയന്റെ രണ്ടാം മോഷണ’ത്തിന് ശേഷം ടൊവിനോ അഭിനയിക്കുന്ന ചിത്രമാണിത്. അടുത്തിടെ ഈ ചിത്രത്തിന് പാക്കപ്പ് പറഞ്ഞിരുന്നു.
ഇന്‍വസ്റ്റിഗേറ്റീവ് ത്രില്ലര്‍ ജോണറിലുള്ള ഒരു ചിത്രമാണിത്. എന്നാല്‍ പതിവു രീതിയിലുള്ള അന്വേഷണങ്ങളുടെ കഥയില്‍ നിന്നും വിപരീതമായിരിക്കും എന്നാണ് അണിയറ പ്രവര്‍ത്തകര്‍ പറയുന്നത്. സിദ്ദിഖ്, ഇന്ദ്രന്‍സ്, ഷമ്മി തിലകന്‍ ബാബുരാജ്, പ്രമോദ് വെളിയനാട്, വിനീത് തട്ടില്‍, രമ്യാ സുവി ( നന്‍ പകല്‍ മയക്കം ഫെയിം) എന്നിവര്‍ പ്രധാന താരങ്ങളാണ്.