മമ്മൂട്ടിയുടെ ‘കുഞ്ഞനന്തന്റെ കട’ എന്ന ചിത്രത്തിലൂടെ മലയാള സിനിമാരംഗത്തേക്ക് എത്തിയ താരമാണ് നൈല ഉഷ. ഗ്യംഗ്സ്റ്റര്‍, ഫയര്‍മാന്‍, പത്തേമാരി തുടങ്ങിയ മമ്മൂട്ടി ചിത്രങ്ങളിലും താരം വേഷമിട്ടിട്ടുണ്ട്. ഏറെ നാളുകള്‍ക്ക് ശേഷം മമ്മൂട്ടിയെ വീണ്ടും കണ്ടതിന്റെ സന്തോഷമാണ് നൈല ഉഷ ഇപ്പോള്‍ പങ്കുവച്ചിരിക്കുന്നത്.
”ആകാശത്തേക്ക് നോക്കുന്നതും കോടാനുകോടി നക്ഷത്രങ്ങളെ കാണുന്നത് സങ്കല്‍പ്പിക്കുക… ഓരോ തവണ കാണുമ്പോഴും മമ്മൂക്ക അതിശയിപ്പിക്കുന്നത് അങ്ങനെയാണ്.. ആരെങ്കിലും എന്നെയുടനെ അദ്ദേഹത്തിനൊപ്പം ഒരു സിനിമയില്‍ അഭിനയിപ്പിക്കൂ” എന്നാണ് നൈല മമ്മൂട്ടിക്കൊപ്പമുള്ള ചിത്രം പങ്കുവച്ചു കൊണ്ട് കുറിച്ചിരിക്കുന്നത്.
രമേഷ് പിഷാരടി, നേഹ അയ്യര്‍ എന്നീ താരങ്ങളും നൈലയുടെ പോസ്റ്റിന് കമന്റുകളുമായി എത്തിയിട്ടുണ്ട്. കുഞ്ഞനന്തനും ചിത്തിരയും, ഇനി ഇക്കയുടെ അമ്മയായിട്ട് കാസ്റ്റ് ചെയ്യാം, ചേച്ചിയാക്കാം എന്നിങ്ങനെയുള്ള രസകരമായ കമന്റുകളും പോസ്റ്റിന് ലഭിക്കുന്നുണ്ട്.
ജോഷി സംവിധാനം ചെയ്ത പൊറിഞ്ചു മറിയം ജോസ് ആണ് നൈലയുടെ അവസാനം തിയേറ്ററുകളിലെത്തിയ ചിത്രം. സുരേഷ് ഗോപി-ജോഷി ചിത്രം പാപ്പാന്‍, ഷറഫുദ്ദീന്‍ നായകനാകുന്ന പ്രിയന്‍ ഓട്ടത്തിലാണ് എന്നീ ചിത്രങ്ങളാണ് നൈലയുടെതായി ഒരുങ്ങുന്നത്. ഭീഷ്മപര്‍വ്വം ആണ് മമ്മൂട്ടിയുടെതായി ഒരുങ്ങുന്ന ഏറ്റവും പുതിയ ചിത്രം.