കേരളത്തില്‍ സമ്മിശ്ര പ്രതികരണം നേടിയ ഒമര്‍ ലുലു ചിത്രം “ഒരു അഡാറ് ലവി”ന് തെലുങ്കില്‍ വന്‍ സ്വീകാര്യത. ചിത്രത്തിന്റെ തെലുങ്ക് പതിപ്പായ “ലവേഴ്‌സ് ഡേ” യൂട്യൂബില്‍ റിലീസ് ചെയ്ത് 12 ദിവസം മാത്രം പിന്നിടുമ്പോള്‍ കാഴ്ചക്കാരുടെ എണ്ണം ഒരു കോടി കവിഞ്ഞു. ജൂണ്‍ 13-ന് ആണ് ചിത്രം തെലുങ്ക് ഫിലിം നഗര്‍ എന്ന ചാനലില്‍ റിലീസ് ചെയ്തത്.
ഇപ്പോള്‍ 14 ദിവസം പിന്നിടുമ്പോള്‍ കാഴ്ചക്കാരുടെ എണ്ണം 10,823,647 ആയിട്ടുണ്ട്. സിനിമയിലെ നൂറിന്‍ ഷെരീഫിന്റെ കഥാപാത്രം ഏറെ ശ്രദ്ധിക്കപ്പെട്ടിട്ടുണ്ട്. തെലുങ്ക് പ്രേക്ഷകര്‍ക്കിടയില്‍ നൂറിന്റെ ഗാഥ എന്ന കഥാപാത്രത്തിന് മികച്ച അഭിപ്രായമാണ് ലഭിക്കുന്നത്. സിനിമയിലെ ഗാനങ്ങളും തെലുങ്കില്‍ വന്‍ ഹിറ്റായി. “ആനന്ദാലെ” എന്ന ഗാനം യുവാക്കള്‍ക്കിടയില്‍ ട്രെന്‍ഡ് ആയി.
സ്‌കൂള്‍ പശ്ചാത്തലത്തിലുളള കഥയാണ് ചിത്രം പറയുന്നത്. ഷാന്‍ റഹമാന്‍ സംഗീതസംവിധാനം നിര്‍വ്വഹിച്ച ചിത്രത്തിലെ എല്ലാ ഗാനങ്ങളും വന്‍ ഹിറ്റായിരുന്നു. റോഷന്‍, പ്രിയ വാര്യര്‍ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങള്‍.