മികച്ച പ്രതികരണങ്ങളുമായി പ്രദര്‍ശനം തുടരുകയാണ് ശംഭു പുരുഷോത്തമന്‍ ചിത്രം “പാപം ചെയ്യാത്തവര്‍ കല്ലെറിയട്ടെ”. കപട സദാചാരത്തെ ചോദ്യം ചെയ്താണ് ശംഭുവിന്റെ “വെടിവഴിപാട്” എത്തിയതെങ്കില്‍ ഒരു സാമൂഹ്യ ആക്ഷേപഹാസ്യമായാണ് പാപം ചെയ്യാത്തവര്‍ കല്ലെറിയട്ടെ ഒരുക്കിയിരിക്കുന്നത്.
മറ്റൊരാളുടെ ജീവിതത്തിലേക്കും അവിഹിതങ്ങളിലേക്കും എത്തിനോക്കി അവരെ കുറ്റപ്പെടുത്തുമ്പോള്‍ താന്‍ പാപിയാണോ എന്ന സ്വയം പരിശോധനയാണ് വേണ്ടതെന്ന സന്ദേശമാണ് ഈ ചിത്രം മുന്നോട്ട് വയ്ക്കുന്നത്. സാമ്പത്തികമായി തകര്‍ന്ന അപ്പര്‍ മിഡില്‍ക്ലാസ് കുടുംബത്തിലെ ഇളമുറക്കാരനായ റോഹന്റെ വിവാഹനിശ്ചയമാണ് ചിത്രത്തെ മുന്നോട്ട് കൊണ്ടുപോവുന്നത്. വിവാഹം ഒരു കച്ചവടം മാത്രമാണെന്നും ബന്ധങ്ങള്‍ക്ക് വലിയ വിലയൊന്നുമില്ലെന്നും ചിത്രം വ്യക്തമാക്കുന്നുണ്ട്.
ബിസിനസിലൂടെ ഉണ്ടായ നഷ്ടം സ്ത്രീധനത്തിലൂടെ മറിക്കടക്കണം എന്നാണ് റോഹന്റെ സഹോദരന്‍മാര്‍ കണക്ക് കൂട്ടുന്നത്. അരുണ്‍ കുര്യനാണ് റോഹനായി എത്തുന്നത്. ശാന്തി ബാലചന്ദ്രനാണ് പ്രതിശ്രുത വധു ലിന്‍ഡയായി എത്തുന്നത്. വിനയ് ഫോര്‍ട്ട് നായകനായെത്തിയ ചിത്രത്തില്‍ ടിനി ടോം, അനുമോള്‍, ശ്രിന്ദ, മധുപാല്‍, അനില്‍ നെടുമങ്ങാട്, അലന്‍സിയര്‍, സുനില്‍ സുഖദ എന്നിവരും പ്രധാന വേഷത്തിലെത്തുന്നു.
സ്പയര്‍ പ്രൊഡക്ഷന്‍സിന്റെ ബാനറില്‍ സഞ്ജു എസ് ഉണ്ണിത്താന്‍ ആണ് ചിത്രം നിര്‍മിച്ചിരിക്കുന്നത്. ജോമോന്‍ തോമസ് ക്യാമറയും പ്രശാന്ത് പിള്ള സംഗീത സംവിധാനവും നിര്‍വ്വഹിച്ചിരിക്കുന്നു. കാര്‍ത്തിക് ജോഗേഷ് ആണ് എഡിറ്റര്‍. ജയദേവന്‍ ചക്കാടത്ത് സൗണ്ട് ഡിസൈന്‍.