ജയറാം നായകനായെത്തുന്ന “പട്ടാഭിരാമന്‍” ഇന്ന് തിയേറ്ററുകളില്‍. കണ്ണന്‍ താമരക്കുളം സംവിധാന ചെയ്യുന്ന ചിത്രത്തില്‍ ഭക്ഷണത്തെ ദൈവമായി കാണുന്ന ഫുഡ് ഇന്‍സ്‌പെക്ടറായാണ് ജയറാം എത്തുന്നത്. “പട്ടാഭിരാമന്‍” എല്ലാവര്‍ക്കും ഇഷ്ടപ്പെടും ഇല്ലെങ്കില്‍ കാശ് തിരിച്ച് തരുമെന്ന് പ്രഖ്യാപിച്ചിരിക്കുകയാണ് ചിത്രത്തില്‍ ഒരു പ്രധാന കഥാപാത്രത്തെ അവതരിപ്പിക്കുന്ന ഹരീഷ് കണാരന്‍.
ബൈജു സന്തോഷും ഹരീഷും പ്രത്യക്ഷപ്പെട്ട വീഡിയോയിലാണ് ചിത്രം ഏവര്‍ക്കും ഇഷ്ടപ്പെടുമെന്നും ഇല്ലെങ്കില്‍ കാശ് തിരിച്ച് തരുമെന്നും ഹരീഷ് സമ്മതിക്കുന്നത്. ആക്ഷനും കോമഡിയ്ക്കും ഒരുപോലെ പ്രാധാന്യമുള്ള ചിത്രത്തില്‍ ഷീലു എബ്രഹാമും മിയ ജോര്‍ജുമാണ് നായികമാരായി എത്തുന്നത്.
രമേഷ് പിഷാരടി, സുധീര്‍ കരമന, ധര്‍മ്മജന്‍ ബോള്‍ഗാട്ടി, സായ്കുമാര്‍, ജനാര്‍ദ്ദനന്‍, ദേവന്‍, ബിജു പപ്പന്‍, വിജയകുമാര്‍, പ്രേംകുമാര്‍, തെസ്‌നി ഖാന്‍, ബാലാജി, മായാ വിശ്വനാഥ്, പ്രിയാ മേനോന്‍ എന്നിവരാണ് മറ്റ് പ്രധാന താരങ്ങള്‍. അബാം മൂവീസിന്റെ ബാനറില്‍ ഏബ്രഹാം മാത്യു നിര്‍മിക്കുന്ന ചിത്രത്തിന്റെ തിരക്കഥ ദിനേശ് പള്ളത്തിന്റേതാണ്. കൈതപ്രം, മുരുകന്‍ കാട്ടാക്കട എന്നിവരുടെ വരികള്‍ക്ക് ഈണം പകരുന്നത് എം.ജയചന്ദ്രനാണ്. രവിചന്ദ്രനാണ് ഛായാഗ്രഹണം നിര്‍വ്വഹിച്ചിരിക്കുന്നത്.