അവതാരകയും നടിയുമായ പേളി മാണിയുടെ ഗര്‍ഭകാല വിശേഷങ്ങള്‍ വാര്‍ത്തകളാക്കി സെന്‍സേഷണലൈസ് ചെയ്യുന്നതിനെതിരെ സോഷ്യല്‍ മീഡിയയില്‍ വലിയ വിമര്‍ശനങ്ങള്‍ ഉയര്‍ന്നിരുന്നു. ന്യൂസ് 18-നില്‍ വന്ന വാര്‍ത്തയ്ക്ക് താഴെ പേളി നല്‍കിയ കമന്റാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ചയാകുന്നത്.
“”ഗര്‍ഭിണിയായ പേളിക്ക് പൊതിച്ചോറ് കഴിക്കാന്‍ കൊതി”” എന്ന വാര്‍ത്തയ്ക്ക് താഴെയാണ് പേളി മാണി എന്ന ഫെയ്‌സ്ബുക്ക് പ്രൊഫൈലില്‍ നിന്നും പ്രതികരണം എത്തിയത്. “”ദയവായി എന്നെ വെറുതെ വിടൂ…ന്യൂസ് 18… ഇത് വിനീതമായ അപേക്ഷയാണ്”” എന്നാണ് പേളി കുറിച്ചിരിക്കുന്നത്. നിരവധി പേരാണ് കമന്റിന് ലൈക്കടിച്ചും മറുപടി നല്‍കിയും രംഗത്തെത്തിയിരിക്കുന്നത്.
പേളി തന്റെ യൂട്യൂബ് ചാനലില്‍ പങ്കുവെച്ച പൊതിച്ചോര്‍ ഉണ്ടാക്കുന്ന വീഡിയോയാണ് ഈ വാര്‍ത്തയ്ക്ക് ആധാരം. അമ്മയുണ്ടാക്കി തരുന്ന പൊതിച്ചോറിന്റെ രുചി പറഞ്ഞു കൊണ്ടാണ് പേളി വീഡിയോ ആരംഭിച്ചിരിക്കുന്നത്. വാഴയില മുറിക്കുന്നത് മുതല്‍ ചോറ് കഴിക്കുന്നത് വരെയുള്ള കാര്യങ്ങളാണ് പേളി വീഡിയോയില്‍ പങ്കുവച്ചത്.
ലുഡോ ആണ് പേളിയുടെതായി ഒടുവില്‍ പുറത്തിറങ്ങിയ ചിത്രം. പേളിയുടെ ആദ്യ ബോളിവുഡ് ചിത്രമാണിത്. ചിത്രത്തിലെ പ്രകടനത്തിന് ഈ വര്‍ഷത്തെ മികച്ച നവാഗത താരത്തിനുള്ള നെറ്റ്ഫ്‌ളിക്‌സ് തുടുംസ് പീപ്പിള്‍സ് ചോയ്‌സ് പുരസ്‌കാരം പേളിക്ക് ലഭിച്ചിരിന്നു. മലയാളി നഴ്‌സിന്റെ വേഷത്തിലാണ് ചിത്രത്തില്‍ താരം എത്തിയത്.