ദിലീപ് ചിത്രം ‘ബാന്ദ്ര’യ്‌ക്കെതിരെ നെഗറ്റീവ് റിവ്യൂ നടത്തിയ യൂട്യൂബര്‍മാര്‍ക്കെതിരെ കേസ് എടുക്കണമെന്നാവശ്യപ്പെട്ട് ഹര്‍ജി. ചിത്രത്തിന്റെ നിര്‍മ്മാതാക്കളായ അജിത് വിനായക ഫിലിംസാണ് തിരുവനന്തപുരം ജുഡിഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയെ സമീപിച്ചത്.
അശ്വന്ത് കോക്ക്, ഷിഹാബ്, ഉണ്ണി ബ്ലോഗ്‌സ്, ഷാസ് മുഹമ്മദ്, അര്‍ജുന്‍, ഷിജാസ് ടോക്ക്‌സ്, സായ് കൃഷ്ണ എന്നീ ഏഴ് യൂടൂബര്‍മാര്‍ക്കെതിരെ കേസ് എടുക്കണമെന്നാവശ്യപ്പെട്ടാണ് ഹര്‍ജി സമര്‍പ്പിച്ചിരിക്കുന്നത്. ഇവര്‍ക്കെതിരെ കേസ് എടുക്കാന്‍ തിരുവനന്തപുരം സിറ്റി പൊലീസ് കമ്മീഷണര്‍ക്ക് നിര്‍ദേശം നല്‍കണമെന്ന് നിര്‍മ്മാണ കമ്പനി ഹര്‍ജിയില്‍ ആവശ്യപ്പെടുന്നുണ്ട്.
സിനിമയിലെ ദിലീപിനെ കോമഡിയായി അനുകരിച്ചു കൊണ്ടായിരുന്നു അശ്വന്ത് കോക്കിന്റെ റിവ്യൂ. താരത്തെ പരിഹസിച്ചു കൊണ്ടുള്ള റിവ്യൂ സോഷ്യല്‍ മീഡിയയില്‍ ശ്രദ്ധ നേടുകയും ചെയ്തിരുന്നു. അതേസമയം, വലിയ ഹൈപ്പോടെ തിയേറ്ററുകളില്‍ എത്തിയ ചിത്രമായിരുന്നു അരുണ്‍ ഗോപിയുടെ സംവിധാനത്തില്‍ ഒരുങ്ങിയ ബാന്ദ്ര.
കുടുംബബന്ധങ്ങളുടെ വൈകാരികതയും പരാമര്‍ശിക്കുന്ന ചിത്രമാണെങ്കിലും ആക്ഷനാണ് പ്രാധാന്യം നല്‍കിയിരിക്കുന്നത്. ചിത്രം 2.82 കോടി കളക്ഷനാണ് മൂന്ന് ദിവസത്തിനുള്ളില്‍ നേടിയത്. എന്നാല്‍ നവംബര്‍ 10ന് റിലീസ് ചെയ്ത ചിത്രം ഇപ്പോള്‍ തിയേറ്ററില്‍ തളരുകയാണ്.
ബോളിവുഡ് നടിയായ താരാ ജാനകി ആയാണ് തമന്ന വേഷമിട്ടത്. അലന്‍ അലക്സാണ്ടര്‍ ഡൊമനിക് എന്ന കഥാപാത്രമായാണ് ദിലീപ് വേഷമിട്ടത്. മംമ്ത മോഹന്‍ദാസ്, തമിഴ് താരം ശരത് കുമാര്‍, ബോളിവുഡ് നടന്‍ ദിനോ മോറിയ എന്നിവരും സിനിമയില്‍ പ്രധാന കഥാപാത്രങ്ങളായി എത്തിയിരുന്നു.