ബോക്‌സോഫീസില്‍ ചരിത്രം രചിച്ചിരിക്കുകയാണ് മണിരത്നം ചിത്രം ‘പൊന്നിയിന്‍ സെല്‍വന്‍’. തമിഴ്നാട്ടില് നിന്ന് മാത്രമായി 200 കോടിയില്‍പരം കളക്ഷനാണ് ചിത്രം നേടിയിരിക്കുന്നത്. കമല്‍ ഹാസന്‍ ചിത്രം വിക്രമിന്റെ കളക്ഷന്‍ മറികടന്ന് 202.70 കോടിയാണ് നേടിയത്. തമിഴ്നാട്ടില് നിന്ന് 200 കോടി നേടുന്ന ആദ്യ ചിത്രമായിരിക്കുകയാണ് പൊന്നിയിന്‍ സെല്‍വന്‍.
ആഗോള തലത്തില്‍ 435 കോടിക്ക് മുകളിലാണ് സിനിമയുടെ കളക്ഷന്‍. ഈ വര്‍ഷം 400 കോടി ക്ലബില്‍ ഇടം നേടുന്ന രണ്ടാം ചിത്രമാണ് പൊന്നിയിന്‍ സെല്‍വന്‍.
ചിത്രം ഇതിഹാസ സാഹിത്യകാരന്‍ കല്‍ക്കി കൃഷ്ണമൂര്‍ത്തിയുടെ പ്രസിദ്ധമായ നോവലിനെ ആസ്പദമാക്കിയാണ് ഒരുക്കിയത്. പൊന്നിയിന്‍ സെല്‍വന്‍ രണ്ടാം ഭാഗം ഒമ്പത് മാസത്തിനുള്ളില്‍ റിലീസ് ചെയ്യുമെന്ന് മണിരത്നം വ്യക്തമാക്കിയിരുന്നു. ഒന്നാം ഭാഗത്തിനൊപ്പം തന്നെ രണ്ടാം ഭാഗത്തിന്റെയും ചിത്രീകരണം നടന്നിരുന്നുവെന്നും വിഎഫ്എക്‌സ് വര്‍ക്കുകള്‍ ഉടന്‍ പൂര്‍ത്തിയാകുമെന്നും അദ്ദേഹം പറഞ്ഞു.
വിക്രം, ഐശ്വര്യ റായ്, തൃഷ, ജയം രവി, കാര്‍ത്തി, റഹ്‌മാന്‍, പ്രഭു, ശരത് കുമാര്‍, ജയറാം, പ്രകാശ് രാജ്, ലാല്‍, വിക്രം പ്രഭു, പാര്‍ത്ഥിപന്‍, ബാബു ആന്റണി, അശ്വിന്‍ കാകുമാനു, റിയാസ് ഖാന്‍, ശോഭിതാ ധുലിപാല, ജയചിത്ര തുടങ്ങി ഒട്ടേറേ അഭിനേതാക്കളാണ് പൊന്നിയിന്‍ സെല്‍വനില്‍ അണിനിരക്കുന്നത്.