തന്റെ ജീവിതത്തിലേക്ക് ഒരു സ്പെഷ്യല് വ്യക്തി കടന്നു വരികയാണെന്ന് പറഞ്ഞു കൊണ്ടുള്ള നടന്‍ പ്രഭാസിന്റെ ഇന്‍സ്റ്റഗ്രാം സ്റ്റോറി ഏറെ ചര്‍ച്ചയായിരുന്നു. താരത്തിന്റെ വിവാഹത്തെ കുറിച്ചുള്ള ചര്‍ച്ചകളാണ് പിന്നീട് സോഷ്യല്‍ മീഡിയയില്‍ ശക്തമായത്. പലപ്പോഴും പ്രഭാസിനൊപ്പം ഗോസിപ് കോളങ്ങളില്‍ നിറയാറുള്ള നടി അനുഷ്‌ക ഷെട്ടിയെ താരം വിവാഹം ചെയ്യുമെന്ന പ്രചാരണങ്ങള്‍ വരെ എത്തിയിരുന്നു.
‘പ്രിയപ്പെട്ടവരേ, എനിക്ക് ഏറെ പ്രത്യേകതയുള്ള ഒരാള്‍ ജീവിതത്തിലേക്ക് കടന്നു വരാന്‍ പോകുന്നു, കാത്തിരിക്കൂ” എന്നായിരുന്നു പ്രഭാസിന്റെ പോസ്റ്റ്. എന്നാല്‍ ഈ പോസ്റ്റിന് പിന്നില്‍ തന്റെ വിവാഹകാര്യമല്ല എന്ന് വ്യക്തമാക്കിയിരിക്കുകയാണ് പ്രഭാസ്. താരം പോസ്റ്റ് ചെയ്ത മറ്റൊരു ഇന്‍സ്റ്റ സ്‌റ്റോറിയാണ് ഇപ്പോള്‍ ചര്‍ച്ചയാകുന്നത്.
പുതിയ ചിത്രം ‘കല്‍2898 എഡി’യുടെ അപ്‌ഡേറ്റ് വരുന്നതിനെ കുറിച്ച് ആയിരുന്നു തന്റെ ആദ്യത്തെ പോസ്റ്റ് എന്ന് വ്യക്തമാക്കി കൊണ്ടാണ് നടന്‍ സിനിമയുടെ പോസ്റ്റര്‍ പങ്കുവച്ചിരിക്കുന്നത്. മെയ് 18ന് 5 മണിക്കാണ് ചിത്രത്തിന്റെ പുതിയ അപ്‌ഡേറ്റ് എത്തുക. ഇക്കാര്യമാണ് പ്രഭാസ് കുറച്ചധികം ബില്‍ഡപ്പ് നല്‍കി പങ്കുവച്ചത്.
നാഗ് അശ്വിന്‍ സംവിധാനം ചെയ്യുന്ന ‘കല്‍കി 2898 എഡി’യില്‍ പ്രഭാസിനെ കൂടാതെ അമിതാഭ് ബച്ചന്‍, കമല്‍ഹാസന്‍, ദീപിക പദുക്കോണ്‍, ദിഷ പഠാനി, രാജേന്ദ്ര പ്രസാദ്, പശുപതി, അന്ന ബെന്‍ എന്നിവരാണ് പ്രധാന വേഷങ്ങളിലെത്തുന്നത്. ജൂണ്‍ 27ന് ആണ് ചിത്രത്തിന്റെ റിലീസ്.
ഈ സയന്‍സ് ഫിക്ഷന്‍ ഫാന്റസി ചിത്രം നാഗ് അശ്വിനാണ് സംവിധാനം ചെയ്യുന്നത്. വൈജയന്തി മൂവീസിന്റെ ബാനറില്‍ സി അശ്വിനി ദത്താണ് കല്‍ക്കി നിര്‍മ്മിക്കുന്നത്. പുരാണങ്ങളില്‍ നിന്ന് പ്രചോദനം ഉള്‍ക്കൊണ്ട് ഭാവിയെ തുറന്നുകാണിക്കുന്ന ഒരു സയന്‍സ് ഫിക്ഷനാണ് കല്‍ക്കി എന്നാണ് റിപ്പോര്‍ട്ടുകള്‍.