ഭര്‍ത്താവും നടനുമായ രണ്‍ബീര്‍ കപൂറിനൊപ്പമുള്ള പുതിയ ചിത്രം ‘ബ്രഹ്‌മാസ്ത്ര’യുടെ പ്രമോഷന്‍ പരിപാടികളില്‍ സജീവമാണ് ആലിയ ഭട്ട് . ഈ സിനിമയുടെ പ്രമോഷന്‍ പരിപാടിക്കിടെ ലൈവില്‍ ആലിയ ഭട്ടിന്റെ ശരീരത്തെ കുറിച്ച് രണ്‍ബീര്‍ പറഞ്ഞൊരു കമന്റ് ഇപ്പോള്‍ വിവാദമായിരിക്കുകയാണ്. ഗര്‍ഭിണിയാകുമ്പോള്‍ സ്ത്രീകള്‍ പൊതുവെ വണ്ണം വയ്ക്കാറുണ്ട്. ഒപ്പം കുഞ്ഞ് വളരുന്നതിന് അനുസരിച്ച് വയറും കൂടിവരാം. ഇതിനെക്കുറിച്ചായിരുന്നു രണ്‍ബീറിന്റെ കമന്റ്.
പുതിയ സിനിമയുടെ പ്രമോഷന്‍ എന്തുകൊണ്ടാണ് പരിമിതപ്പെടുത്തിയതെന്ന് വിശദീകരിക്കുകയായിരുന്നു ആലിയ. ഇതിനിടയ്ക്ക് കയറിയാണ് രണ്‍ബീര്‍ സംസാരിച്ചത്. ഞങ്ങള്‍ എന്തുകൊണ്ടാണ് ഇതിങ്ങനെ പരത്താത്തത് എന്ന് ചോദിച്ചാല്‍… ഞങ്ങളുടെ ഫോക്കസ്…’… എന്നിങ്ങനെ ആലിയ പറയുന്നതിനിടെ, ‘ആഹ്, ഇവിടെ ഒരാള്‍ പരന്നിരിക്കുന്നതായി എനിക്ക് കാണാം കെട്ടോ…’ എന്നായിരുന്നു രണ്‍ബീറിന്റെ കമന്റ്.
പെടുന്നനെ ആലിയ എന്താണ് പറയുന്നതെന്ന് മനസിലാക്കാതെ അത്ഭുതപ്പെടുകയും ഉടനെ തന്നെ ‘തമാശയാണ്’ എന്ന് രണ്‍ബീര്‍ പറയുകയും ചെയ്യുന്നുണ്ട്. ഇതിന് ശേഷം ആലിയയും അത് തമാശയായി തന്നെയെടുക്കുന്നുണ്ട്.
രണ്‍ബീറിന്റേത് അത്ര നല്ല തമാശയല്ലെന്നാണ് സോഷ്യല്‍മീഡിയയിലുയര്‍ന്ന അഭിപ്രായം. ഗര്‍ഭിണികള്‍ക്ക് പൊതുവെ അവരുടെ ശരീരത്തില്‍ വരുന്ന മാറ്റങ്ങള്‍ ഉള്‍ക്കൊള്ളാന്‍ ബുദ്ധിമുട്ട് നേരിടാറുണ്ടെന്നും പങ്കാളി തന്നെ പരിഹസിക്കുന്നത് ഒട്ടും ആരോഗ്യകരമല്ലെന്നാണ് കമന്റുകള്‍ പറയുന്നത്.
