മലയാള സിനിമയിലെ ഫിറ്റ്‌നസ് ഫ്രീക്കന്‍മാരാണ് പൃഥ്വിരാജും ടൊവിനോ തോമസും. ഇരുവരും ജിമ്മില്‍ ഒന്നിച്ചെത്തിയ ചിത്രമാണ് സോഷ്യല്‍ മീഡിയയില്‍ ഇപ്പോള്‍ വൈറലാകുന്നത്. “”സയീദ് മസൂദും ജതിന്‍ രാംദാസും ജിമ്മില്‍ ഒരുമിച്ച്”” എന്ന ക്യാപ്ഷനോടെ പൃഥ്വിരാജാണ് ചിത്രം പങ്കുവെച്ചിരിക്കുന്നത്.
എമ്പുരാന് ലോഡിംഗ് ആണെന്ന് ക്യാപ്ഷനില്‍ നിന്നും വായിച്ചെടുക്കാം എന്ന കമന്റുകളുമായാണ് ആരാധകര്‍ എത്തിയിരിക്കുന്നത്. അബ്രഹാം ഖുറേഷിക്കായുള്ള കാത്തിരിപ്പിലാണ്, ഭായ് ജാന്‍ എവിടെ എന്നിങ്ങനെയാണ് ആരാധകരുടെ കമന്റുകള്‍.
പൃഥ്വിരാജ് സംവിധാനം ചെയ്ത ലൂസിഫറിന്റെ വന്‍ വിജയത്തിന് ശേഷം രണ്ടാം ഭാഗമായ എമ്പുരാന് വേണ്ടിയുള്ള കാത്തിരിപ്പിലാണ് ആരാധകര്‍. ചിത്രത്തിന്റെ തിരക്കഥാകൃത്തും നടനുമായ മുരളി ഗോപിയും പൃഥ്വിരാജും എമ്പുരാന് ഉടനെ എത്തുമെന്നുള്ള സൂചനകളും ഇടക്ക് സോഷ്യല്‍ മീഡിയയില്‍ പങ്കുവയ്ക്കാറുണ്ട്.
ലൂസിഫറില്‍ ജതിന്‍ രാംദാസ് എന്ന കഥാപാത്രമായാണ് ടൊവിനോ വേഷമിട്ടത്. സയീദ് മസൂദ് എന്ന കാമിയോ റോളിലാണ് പൃഥ്വിരാജ് എത്തിയത്. എമ്പുരാനിലും ഇതേ റോളുകളില്‍ ഇരുവരെയും പ്രതീക്ഷിക്കാം എന്നാണ് ചിത്രങ്ങളിലൂടെ സൂചന നല്‍കുന്നത്.