മകള്‍ അലംകൃതയുടെ പേരിലുള്ള വ്യാജ ഇന്‍സ്റ്റഗ്രാം അക്കൗണ്ടിന്റെ സ്‌ക്രീന്‍ ഷോട്ട് പങ്കുവെച്ച് നടന്‍ പൃഥ്വിരാജും ഭാര്യ സുപ്രിയ മേനോനും. അല്ലി പൃഥ്വിരാജ് എന്ന പേരിലാണ് വ്യാജ അക്കൗണ്ട്. സുപ്രിയയും പൃഥ്വിരാജും ആണ് അക്കൗണ്ട് മാനേജ് ചെയ്യുന്നത് എന്നും പ്രൊഫൈലില്‍ കൊടുത്തിട്ടുണ്ട്.
“”ഈ വ്യാജ ഹാന്‍ഡില്‍ നിങ്ങളുടെ ശ്രദ്ധ ആകര്‍ഷിക്കാന്‍ ആഗ്രഹിക്കുന്നു. ഇത് ഞങ്ങള്‍ നിയന്ത്രിക്കുന്ന പേജല്ല, ഞങ്ങളുടെ 6 വയസ്സുള്ള മകള്‍ക്ക് ഒരു സോഷ്യല്‍ മീഡിയ പേജിന്റെ ആവശ്യകത ഞങ്ങള്‍ കാണുന്നില്ല. പ്രായമാകുമ്പോള്‍ അവള്‍ക്ക് അതേക്കുറിച്ച് സ്വയം തീരുമാനിക്കാം. അതിനാല്‍ ദയവായി ഇതിന് ഇരയാകരുത്”” എന്നാണ് പൃഥ്വിയും സുപ്രിയയും ഇന്‍സ്റ്റഗ്രാമില്‍ കുറിച്ചിരിക്കുന്നത്.
പോസ്റ്റുകള്‍ ഒന്നും പങ്കുവെയ്ക്കാത്ത അക്കൗണ്ടിന് ഇതിനോടകം 934 ഫോളോവേഴ്‌സ് ഉണ്ട്. 7 പേരെ ഈ അക്കൗണ്ട് ഫോളോ ചെയ്യുന്നുമുണ്ട്. മകളുടെ വിശേഷങ്ങള്‍ പങ്കുവെയ്ക്കാറണ്ടെങ്കിലും മുഖം കാണിക്കുന്ന ചിത്രങ്ങള്‍ അധികവും പങ്കുവെയ്ക്കാറില്ല. ആറാം പിറന്നാള്‍ ദിനത്തില്‍ അല്ലിയുടെ ചിത്രം പൃഥ്വിയും സുപ്രിയയും പങ്കുവെച്ചിരുന്നു.
അതേസമയം, കോവിഡ് മുക്തനായ പൃഥ്വിരാജ് കോള്‍ഡ് കേസ് എന്ന സിനിമയുടെ സെറ്റിലാണ് ജോയിന്‍ ചെയ്യാനിരിക്കുന്നത്. ജനഗണമന എന്ന സിനിമയില്‍ അഭിനയിച്ചതിന് പിന്നാലെയാണ് പൃഥ്വിരാജിന് കോവിഡ് ബാധിച്ചത്.