ലവ് എഗെയ്ന്‍ എന്ന ചിത്രത്തിന്റെ തിരക്കുകളിലാണ് നടി പ്രിയങ്ക ചോപ്ര. കഴിഞ്ഞ ദിവസം ചിത്രത്തിന്റെ പ്രീമിയറിനായി എത്തിയ പ്രിയങ്കയുടെ ലുക്ക് വൈറലായിരുന്നു. എന്നാല്‍ പരിപാടിക്കിടെ താന്‍ റെഡ് കാര്‍പ്പറ്റില്‍ വീണെന്ന് തുറന്നു പറഞ്ഞിരിക്കുകയാണ് പ്രിയങ്ക.
കഴിഞ്ഞ ആഴ്ചയാണ് നിക്കിനൊപ്പം പ്രിയങ്ക ലവ് എഗെയ്നിന്റെ പ്രീമിയറില്‍ പങ്കെടുത്തത്. ഉയരം തോന്നിക്കാനായി വലിയ ഹൈ ഹീല്‍ ചെരുപ്പാണ് അവര്‍ ധരിച്ചിരുന്നത് . ‘റെഡ് കാര്‍പ്പറ്റില്‍ നിറയെ പത്രപ്രവര്‍ത്തകരായിരുന്നു. എല്ലാവരും ചിത്രങ്ങള്‍ എടുക്കുകയാണ്. കൂടാതെ ആരാധകരും. റെഡ് കാര്‍പ്പറ്റില്‍ വെച്ച് എന്റെ ചെരുപ്പിലേക്ക് ഞാന്‍ മറിഞ്ഞുവീണു. എന്നാല്‍ എല്ലാവരും കാമറ താഴ്ത്തി. ‘പ്രശ്നമില്ല പ്രി, സമയം എടുത്തോളൂ’ എന്ന് അവര്‍ പറഞ്ഞു.
എന്റെ 23 വര്‍ഷത്തെ കരിയറില്‍ ആദ്യമായാണ് അത് കാണുന്നത്. ഞാന്‍ ആദ്യം നാണിച്ചുപോയിരുന്നു എന്നാല്‍ നിങ്ങള്‍ എപ്പോഴും നല്ലതാണ്, ഇതൊന്നും പ്രശ്നമില്ല എന്നൊക്കെയാണ് അവര്‍ എന്നോട് പറഞ്ഞത്. ഇതുവരെ ഞാന്‍ വീഴുന്നതിന്റെ ഒരു ക്ലിപ്പും ഇല്ല. എത്ര നല്ലതാണ്. എനിക്ക് അഞ്ചു പേരുടെ സഹായം ലഭിച്ചു. എന്റെ ഭര്‍ത്താവും ഓടിയെത്തി.’ – എബിസിക്ക് നല്‍കിയ അഭിമുഖത്തില്‍ പ്രിയങ്ക പറഞ്ഞു.
റൊമാന്റിക് കോമഡി ചിത്രമായി എത്തുന്ന ലവ് എഗെയ്നില്‍ സാം ഹ്യൂഗനാണ് പ്രിയങ്കയുടെ നായകനായി എത്തുന്നത്. നിക് ജൊനാസ് ചിത്രത്തില്‍ അതിഥി വേഷം ചെയ്യുന്നുണ്ട്. ആമസോണ്‍ പ്രൈമില്‍ റിലീസ് ചെയ്ത സിറ്റാഡലാണ് പ്രിയങ്കയുടേതായി അവസാനം പുറത്തിറങ്ങിയത്.
