തലൈവര്‍ രജനികാന്ത്, തല അജിത്ത്, ദളപതി വിജയ് എന്നീ താരങ്ങളെ വെച്ച് സിനിമ ഒരുക്കിയ സംവിധായകനാണ് എആര്‍ മുരുഗദോസ്. രജനികാന്തിനെ നായകനാക്കി ഒരുക്കുന്ന “ദര്‍ബാര്‍” ആണ് ഏറ്റവും പുതിയ മുരുഗദോസ് ചിത്രം. ദര്‍ബാറിന്റെ ഓഡിയോ ലോഞ്ചിനിടെ മുരുഗദോസ് പറഞ്ഞ ഒരു മറുപടിയാണ് ഇപ്പോള്‍ ഹിറ്റായിരിക്കുന്നത്.
ദളപതി, തല, തലൈവര്‍ എന്നിവര്‍ തമ്മിലുള്ള ഒരു സാമ്യം എന്താണ് എന്ന് അവതാരക സംവിധായകനോട് ചോദിച്ചു. തലൈവര്‍ വേറെ ലെവല്‍ എന്നായിരുന്നു മുരുഗദോസിന്റെ മറുപടി. അദ്ദേഹത്തിനെ ആരുമായും താരതമ്യപ്പെടുത്താന്‍ പറ്റില്ലെന്നും തലൈവരോട് മത്സരിക്കാന്‍ തലൈവര്‍ക്ക് മാത്രമേ സാധിക്കൂ എന്നും അദ്ദേഹം വേറിട്ട് നില്‍ക്കുന്ന പ്രതിഭാസമാണെന്നും സംവിധായകന്‍ പറഞ്ഞു.
അജിത്തിനെ നായകനാക്കി “ദീന” എന്ന ചിത്രം മുരുഗദോസ് ഒരുക്കിയിരുന്നു. വിജയ്‌യെ നായകനാക്കി “തുപ്പാക്കി”, “കത്തി”, “സര്‍ക്കാര്‍” എന്നീ ചിത്രങ്ങളും മുരുഗദോസ് ഒരുക്കിയിട്ടുണ്ട്. മുരുഗദോസിന്റെ അടുത്ത ചിത്രത്തില്‍ അജിത്ത് നായകനായി എത്തും എന്ന റിപ്പോര്‍ട്ടുകളുമുണ്ട്.