രജനികാന്തും ആരാധകരും തമ്മിലുള്ള ബന്ധത്തെ കുറിച്ച് നടന്‍ വിശാല്‍ സരോയി പറഞ്ഞ വാക്കുകള്‍ ശ്രദ്ധ നേടുന്നു. രജനിക്കൊപ്പം ‘കാല’, ‘ദര്‍ബാര്‍’ എന്നീ ചിത്രങ്ങളില്‍ വേഷമിട്ട താരമാണ് വിശാല്‍ സരോയി. ആരാധകര്‍ക്കൊപ്പം ചിത്രങ്ങള്‍ പകര്‍ത്തി, അത് പിഡിഎഫ് ആയി അയച്ചു കൊടുക്കുന്നയാളാണ് രജനികാന്ത് എന്നായിരുന്നു വിശാല്‍ പറഞ്ഞത്.
ആരാധകര്‍ക്കൊപ്പം ചിത്രങ്ങള്‍ക്ക് പോസ് ചെയ്യാനും അത് മനോഹരമായ ഓര്‍മ്മയാക്കി മാറ്റാനും രജനികാന്തിന്റെ ഭാഗത്ത് നിന്നുള്ള ശ്രമങ്ങളെ കുറിച്ചാണ് വിശാല്‍ പറയുന്നത്. ”വൈകുന്നേരം, പാക്ക് അപ്പ് കഴിഞ്ഞ് തന്റെ മേക്കപ്പും കോസ്റ്റ്യൂമും ഒക്കെ മാറ്റി, അദ്ദേഹത്തിന്റെ യഥാര്‍ത്ഥ ലുക്കിലായിരിക്കുമ്പോള്‍ അദ്ദേഹം നിങ്ങളെ വിളിക്കും.”
”നിങ്ങളുടെ ഫോണില്‍ ചിത്രമെടുക്കാന്‍ അദ്ദേഹം സമ്മതിക്കില്ല, പകരം സ്വന്തം ക്യാമറയില്‍ ചിത്രങ്ങള്‍ പകര്‍ത്തും. എന്നിട്ട് നിങ്ങള്‍ക്ക് ചിത്രങ്ങള്‍ പിഡിഎഫ് ഫയല്‍ ഫോര്‍മാറ്റിലാക്കി ചിത്രങ്ങള്‍ അയയ്ക്കും. എന്തുകൊണ്ടാണ് ക്യാമറയില്‍ ചിത്രങ്ങള്‍ എടുക്കുന്നത് എന്ന ചോദ്യത്തിന് മറുപടിയുണ്ട്.”
”മികച്ച നിലവാരത്തിനും ആളുകളുടെ ഓര്‍മ്മകളില്‍ ശാശ്വതമായ മുദ്ര പതിപ്പിക്കുന്നതിനും വേണ്ടിയാണത് എന്ന് അദ്ദേഹം പറയും” എന്നായിരുന്നു വിശാല്‍ പറഞ്ഞത്. അതേസമയം, രജികാന്ത് ചിത്രം ജയിലര്‍ ഓഗസ്റ്റ് 10ന് ആണ് റിലീസിനൊരുങ്ങുന്നത്. ചിത്രത്തില്‍ മോഹന്‍ലാലും എത്തുന്നു എന്നതാണ് ഒരു ഹൈലൈറ്റ്.
ജയിലറില്‍ മുത്തുവേല്‍ പാണ്ഡ്യന്‍ എന്ന റിട്ടയേര്‍ഡ് പോലീസുകാരന്റെ വേഷത്തിലാണ് രജനികാന്ത് എത്തുന്നത്. ശിവരാജ് കുമാര്‍, മോഹന്‍ലാല്‍, തമന്ന, രമ്യാ കൃഷ്ണന്‍, യോഗി ബാബു, വസന്ത് രവി, റെഡിന്‍ കിംഗ്സ്ലി, വിനായകന്‍, ജാഫര്‍ സാദിഖ് എന്നിവരാണ് ചിത്രത്തിലുള്ളത്.