‘വേട്ടയ്യന്‍’ സിനിമയുടെ റിലീസിന് മുമ്പ് ഗംഭീര ആഘോഷ പരിപാടികളുമായി രജനികാന്ത് ആരാധകര്‍. ചിത്രത്തിന്റെ റിലീസ് ദിവസം വലിയ രീതിയിലുള്ള ആഘോഷ പരിപാടികളാണ് രജനി ഫാന്‍സ് ഒരുക്കിയിരിക്കുന്നത്. രജനിയുടെ 50 അടി കട്ട്ഔട്ടില്‍ പാലഭിഷേകം നടത്തും.
വേട്ടയ്യന്റെ ആദ്യ ഷോ തുടങ്ങും മുന്നേ തിയേറ്ററുകളില്‍ രജനികാന്തിന്റെ പാട്ടുകളുടെ ഡി ജെ നടത്താനും തീരുമാനം ആയിട്ടുണ്ട് എന്നാണ് മുംബൈയിലെ രജനികാന്ത് ഫാന്‍സ് ക്ലബ് അംഗമായ ക്രിസ്റ്റഫര്‍ മാധ്യമങ്ങളോട് പ്രതികരിച്ചിരിക്കുന്നത്. പൊലീസ് എന്‍കൗണ്ടറിനെക്കുറിച്ചാണ് ചിത്രത്തിന്റെ കഥയെന്നാണ് ട്രെയ്‌ലര്‍ നല്‍കുന്ന സൂചന.
മാസ് ആക്ഷന്‍ ത്രില്ലറായാണ് ചിത്രം ഒരുക്കിയിരിക്കുന്നത്. ഒക്ടോബര്‍ 10ന് ആഗോള റിലീസായി ചിത്രം പ്രേക്ഷകരുടെ മുന്നിലെത്തും. ലൈക്ക പ്രൊഡക്ഷന്‍സിന്റെ ബാനറില്‍ സുബാസ്‌കരന്‍ അല്ലിരാജ നിര്‍മ്മിച്ച വേട്ടയ്യന്‍ കേരളത്തില്‍ വമ്പന്‍ റിലീസായി വിതരണത്തിനെത്തിക്കുന്നത് ഗോകുലം ഗോപാലന്റെ ഉടമസ്ഥതയിലുള്ള ശ്രീ ഗോകുലം മൂവീസാണ്.
ഫഹദ് ഫാസില്‍, മഞ്ജു വാരിയര്‍, സാബുമോന്‍ അബ്ദുസമദ്, ഷബീര്‍ കല്ലറക്കല്‍ എന്നീ മലയാള താരങ്ങളും, അമിതാഭ് ബച്ചന്‍, റാണ ദഗുബതി, ശര്‍വാനന്ദ്, ജിഷു സെന്‍ഗുപ്ത, അഭിരാമി, റിതിക സിങ്, ദുഷാര വിജയന്‍, രാമയ്യ സുബ്രമണ്യന്‍, കിഷോര്‍, റെഡ്ഡിന്‍ കിങ്സ്ലി, രോഹിണി, രവി മരിയ, റാവു രമേശ്, രാഘവ് ജൂയാല്‍, രമേശ് തിലക്, ഷാജി ചെന്‍, രക്ഷന്‍, സിങ്കമ്പുലി, ജി എം സുന്ദര്‍ എന്നിവരാണ് ചിത്രത്തിലെ പ്രധാന താരങ്ങള്‍.
