രജനികാന്തിന്റെ 170-ാമത്തെ ചിത്രം പ്രഖ്യാപിച്ചു. ‘ജയ് ഭീം’ എന്ന ഒറ്റച്ചിത്രം കൊണ്ട് ദേശീയ ശ്രദ്ധ നേടിയ ടി.ജെ. ജ്ഞാനവേലിനൊപ്പമാണ് രജനികാന്ത് ഇനി പ്രവര്‍ത്തിക്കാന്‍ ഒരുങ്ങുന്നത്. ലൈക പ്രൊഡക്ഷന്‍സ് ആണ് ചിത്രം നിര്‍മ്മിക്കുന്നത്. ലൈക തന്നെയാണ് ഇക്കാര്യം ട്വിറ്ററിലൂടെ പുറത്തു വിട്ടത്.
നിര്‍മാതാവ് സുബാസ്‌കരന്റെ ജന്മദിനത്തോട് അനുബന്ധിച്ചാണ് ലൈക്ക പ്രൊഡക്ഷന്‍സ് ഈ സര്‍പ്രൈസ് പ്രഖ്യാപനം നടത്തിയിരിക്കുന്നത്. തലൈവര്‍ 170 എന്നാണ് ചിത്രത്തിന് താല്‍ക്കാലികമായി നല്‍കിയിരിക്കുന്ന പേര്. ഏത് വിഭാഗത്തില്‍ പെടുന്നതായിരിക്കും ചിത്രമെന്ന് ഇതുവരെ പുറത്തുവിട്ടിട്ടില്ല.
അനിരുദ്ധ് ആണ് സംഗീത സംവിധാനം. ഉടന്‍ ചിത്രീകരണം ആരംഭിക്കുന്ന ചിത്രം 2024-ല്‍ തിയേറ്ററുകളിലെത്തും. ചിത്രത്തിലെ മറ്റ് താരങ്ങളുടേയും അണിയറപ്രവര്‍ത്തകരുടേയും വിവരങ്ങള്‍ പുറത്ത വിട്ടിട്ടില്ല. ഇത് ഉടന്‍ ഉണ്ടാകുമെന്നാണ് പ്രതീക്ഷിക്കുന്നത്.
‘ജയിലര്‍’ എന്ന ചിത്രത്തിന് ശേഷം രജനികാന്ത് അഭിനയിക്കാന്‍ ഒരുങ്ങുന്ന ചിത്രമാണിത്. അതേസമയം, ജയിലറിന്റെ ചിത്രീകരണ തിരക്കുകളിലാണ് രജനികാന്ത് ഇപ്പോള്‍. നെല്‍സണ്‍ ദിലിപ്കുമാര്‍ സംവിധാനം ചെയ്യുന്ന ചിത്രത്തില്‍ മോഹന്‍ലാല്‍ കാമിയോ റോളില്‍ എത്തുന്നുണ്ട്.
മോഹന്‍ലാലും രജനികാന്തും തമ്മിലുള്ള ഒരു ഫൈറ്റ് സീന്‍ നെല്‍സണ്‍ പ്ലാന്‍ ചെയ്യുന്നുണ്ട് എന്ന് റിപ്പോര്‍ട്ടുകളുണ്ട്. ശിവ രാജ്കുമാര്‍, തമന്ന, രമ്യ കൃഷ്ണന്‍, ജാക്കി ഷ്രോഫ്, വിനായകന്‍, യോഗി ബാബു, വസന്ത് രവി തുടങ്ങിയ താരങ്ങള്‍ ചിത്രത്തില്‍ വേഷമിടുന്നുണ്ട്.