സൂപ്പര്‍ ഹിറ്റ് ചിത്രം ‘ജയിലറി’ന് ശേഷം മറ്റൊരു ഗംഭീര ചിത്രവുമായി രജനികാന്ത്. ടി.ജെ ജ്ഞാനവേല്‍ സംവിധാനം ചെയ്യുന്ന ‘വേട്ടയ്യന്‍’ ചിത്രത്തിന്റെ അവസാന ഷെഡ്യൂള്‍ ആണിപ്പോള്‍ നടന്നു കൊണ്ടിരിക്കുന്നത്. ആന്ധ്ര പ്രദേശിലെ കടപ്പ ജില്ലയില്‍ രണ്ട് ദിവസം മുമ്പാണ് ആരംഭിച്ചത്. രജനിക്കൊപ്പം ഫഹദ് ഫാസില്‍, റാണ ദഗുബതി എന്നിവരും ചിത്രത്തില്‍ അഭിനയിക്കുന്നുണ്ട്.
കടപ്പയില്‍ നിന്നുള്ള ഷൂട്ടിംഗിന്റെ ചിത്രങ്ങളും വീഡിയോയുമാണ് ശ്രദ്ധ നേടുന്നത്. ആക്ഷന്‍ സീക്വന്‍സുകള്‍ ചിത്രീകരിക്കാനുള്ള തയ്യാറെടുപ്പുകളും സോഷ്യല്‍ മീഡിയയില്‍ പ്രചരിച്ചു കൊണ്ടിരിക്കുന്ന ലൊക്കേഷന്‍ വീഡിയോകളില്‍ കാണാം. കുറച്ച് ദിവസങ്ങള്‍ക്കുള്ളില്‍ തന്നെ ഈ ഷെഡ്യൂള്‍ പൂര്‍ത്തിയാകുമെന്നാണ് റിപ്പോര്‍ട്ടുകള്‍.
‘ജയ് ഭീം’ എന്ന ചിത്രത്തിന് ശേഷം ടി. ജെ ജ്ഞാനവേല്‍ സംവിധാനം ചെയ്യുന്ന ചിത്രം രജനിയുടെ കരിയറിലെ 170-ാമത് ചിത്രം കൂടിയാണ്. ചിത്രത്തില്‍ ഒരു പൊലീസ് ഓഫീസറുടെ വേഷത്തിലാണ് രജനി എത്തുന്നത്. 33 വര്‍ഷത്തിന് ശേഷം രജനികാന്തും അമിതാഭ് ബച്ചനും ഒന്നിക്കുന്ന ചിത്രമെന്ന പ്രത്യേകതയും തലൈവര്‍ 170ന് ഉണ്ട്.
മുകുള്‍ എസ് ആനന്ദ് സംവിധാനം ചെയ്ത് 1991ല്‍ പുറത്തിറങ്ങിയ ‘ഹം’ എന്ന ചിത്രത്തിലാണ് അമിതാഭ്- രജനി കൂട്ടുക്കെട്ട് അവസാനമായി ഒന്നിച്ച് അഭിനയിച്ചത്. മഞ്ജു വാര്യര്‍, ദുഷാര വിജയന്‍ എന്നിവരാണ് ചിത്രത്തിലെ മറ്റ് പ്രധാന താരങ്ങള്‍. ലൈക്ക പ്രൊഡക്ഷന്‍സിന്റെ ബാനറില്‍ സുഭാസ്‌ക്കരനാണ് ചിത്രത്തിന്റെ നിര്‍മ്മാണം. അനിരുദ്ധ് രവിചന്ദറാണ് സംഗീതം.